Aleanca për Ardhmërinë e Kosovës e ka zyrtarizuar nominimin e Haki Abazit kandidat për deputet në zgjedhjet parlamentare të 9 shkurtit 2025.
Kryetari i AAK-së Ramush Haradinaj, ka njoftuar se deputeti aktual i Kuvendit të Kosovës ka kaluar në subjekti që ai udhëheq. Haradinaj i ka uruar mirëseardhje Abazit në AAK, në angazhimet e përbashkëta për ta fuqizuar Kosovën.
“Kolegu që është me ne Haki Abazi në shumë etapa të rrugëtimit tonë e ka bërë pjesën e vet të çmuar edhe unë jam dëshmitar i këtij angazhimi të Hakisë të cilin e njoh që nga paslufta për kontributin e tij në mbështetje të shoqërisë civile të demokratizimit të vendit të proceseve demokratike në vend. Përvoja ime e bashkëpunimit me Hakiun në Parlament si deputet flet si vijon: Hakiu nuk ka pas vetëm etiketë partiake por çdoherë ka qenë i hapur për komunikim, për bashkëpunim me të gjithë ne në parlament në shërbim të temave me rëndësi për parlamentin e vendit”, tha Haradinaj.
Edhe i nominuari për deputet nga AAK-ja, Haki Abazi shtoi se ky subjekt ka vizionin më të qartë për anëtarësimin në NATO.
“U tha integrimi në NATO është prioritet mbi prioritete në integrimin e Kosovës ne asnjë herë nuk kemi vuajt për pamundësinë e mbijetesës, e luftës kundër pushtuesve por ne gjithmonë kemi vuajtur të jemi pjesë e vlerave demokratike të mbrohemi e të kontribuojmë për vlera demokratike në Evropë e më gjerë. Mendoj që Aleanca për Ardhmërinë e Kosovës ka vizionin më të qartë, planin më të qartë, hapat e sigurt të depërtimit e deri te anëtarësimi në NATO që është rruga e çdo shteti tjetër që është anëtarësuar në BE që fillimisht të jetë pjesë e ombrellës së sigurisë e cila krijon edhe sigurinë për investime të huaja dhe të diasporës”, tha Abazi duke shtuar se ka vendosur të jetë krahu i Haradinaj dhe miqve në AAK”, tha Abazi.
Prezent në nominimin e Abazit në listën e deputetëve të AAK-së për zgjedhjet e 9 shkurtit, ishte edhe kryetari i Gjakovës Ardian Gjini.
Ai i ka uruar mirëseardhje Abazit dhe e ka falënderuar për besimin që e dha.
