Ministrja e Industrisë, Ndërmarrësisë dhe Tregtisë, Rozeta Hajdari pas aksionit të sotëm ku u arrestuan dy zyrtarë të kësaj ministrie, ka pranuar se në porosinë për rezerva shtetërore që ishte bërë gjatë vitit 2022, 3 % nga totali i porosisë ka pasur vonesa.
Hajdari ka thënë se në qershor të këtij viti kanë angazhuar avokaturën shtetërore për inicim të procedurës gjyqësore.
“Në muajin shkurt të vitit 2022, filloi lufta në Ukrainë ishin edhe eksportet e ndalura nga shumë vende dhe ministra ishte në një sfidë për të siguruar grurin dhe po ashtu produkte të tjera të cilat janë për mbijetesë. Ministria ka paguar avanc për të sjellë grurin nga tregtarët për të cilët ka negociuar nga operatorët, por ka kërkuar edhe nga ambasadat, ministritë homologe të ministrisë sonë. Ka qenë në krizë popullsia jonë, ka qenë në krizë siguria jonë dhe ka qenë në krizë që të mos tregohet se nga vjen gruri apo të tjera rezerva në shtetin tonë”, tha ajo në konferencën për media.
“Deri më tash nga kontrata për furnizim për blerjen e rezervave shtetërore për vitin 2022 vetëm 3% të totalit për furnizim është në vonesa, të cilat vonesa me datë 8 qershor 2023 është njoftuar edhe avokatura shtetërore nga zyra e zëvendëssekretarit për inicim të procedurës gjyqësore. Pra, janë bërë pagesat në avanc, ka pasur 3% vonesa dhe është njoftuar avokatura e shtetit”, shtoi ministrja Hajdari.
Më tej ajo tha se nuk dyshon për keqpërdorime nga ana e zyrtarëve të cilët janë arrestuar.
