Viktor Gyokeres është futbollisti më i ri i skuadrës së Arsenalit.
Klubi londinez të shtunën mbrëma ka njoftuar se ka arritur marrëveshje me Sportingun e Lisbonës për ta transferuar qendërsulmuesin Gyokeres.
Suedezi Gyokeres me “topçinjtë” ka nënshkruar kontratë pesëvjeçare. Sipas raportimeve të mediumeve angleze, Arsenali i ka paguar Sportingut të Lisbonës mbi 73 milionë euro për shërbimet e Reprezentuesit të Suedisë.
Gyokeres do ta veshë fanellën me numër 14-të te skuadra e drejtuar nga trajneri Mikel Arteta.
27-vjeçari ka shkëlqyer te Sportingu në Portugali. Në 102 ndeshjet e zhvilluara realizoi 97 gola dhe bëri 28 asistime.
“Gyokeres është një lojtar i shpejtë dhe i fuqishëm në sulm. Jemi absolutisht të kënaqur që e mirëpresim Gyokeresin në klub. Jemi të entuziazmuar për atë që Viktori do t’i sjellë skuadrës sonë dhe mezi presim të fillojmë të punojmë me të”, ka thënë Arteta për faqen zyrtare të klubit.
