Partia GUXO ka reaguar pas raportimeve për dorëheqje të supozuara të anëtarëve të saj në Deçan dhe Pejë, duke i cilësuar ato si “të pavërteta, tendencioze dhe spekulative”.
Në komunikatën zyrtare, GUXO thekson se pretendimet për largime masive nuk reflektojnë realitetin dhe synojnë të krijojnë një perceptim të rremë te publiku.
Sipas partisë, disa persona nga Pejë, të cilët janë përmendur në media, kanë paraqitur dorëheqje plot shtatë herë më parë dhe nuk kanë marrë pjesë në aktivitetet e partisë për më shumë se një vit e gjysmë.
Gjithashtu, GUXO sqaroi se lajmet për dorëheqje të Kryesisë së degës në Deçan janë të ekzagjeruara. Sipas partisë, vetëm dy anëtarë të kësaj dege janë tërhequr nga GUXO dhe kjo mund të verifikohet lehtë.
Ndër të tjerët, figura të njohura që kanë dhënë dorëheqje më parë përfshijnë deputetin Haxhi Avdyli, si dhe nënkryetarin e partisë, Burim Meta, të cilët kanë shprehur pakënaqësi ndaj udhëheqjes.
Partia njofton se gjatë ditëve në vijim do të publikojë informata më të detajuara dhe do të demantojë çdo dezinformatë.
“Është me rëndësi që qytetarët tanë ta dijnë se tre individët nga Peja, të cilët po përmenden në këto pretendime, kanë paraqitur dorëheqje plot shtatë herë deri më tani dhe ka më shumë se një vjet e gjysmë që janë larguar nga çdo aktivitet i Partisë Guxo. Ky, i sotmi, është një fakt që flet më shumë për seriozitetin e tyre sesa për gjendjen reale në strukturat tona”, thuhet në komunikatë. /teve1.info/
