Ministria e Punëve të Brendshme dhe Administratës Publike në një përgjigje për televizionin ka bërë të ditur se konsultimet publike kanë përfunduar. Ndërsa para se të shkojë në Qeveri, projektligji duhet të kalojë edhe nëpër disa faza të tjera.
“Ministria e Punëve të Brendshme, pas përfundimit të konsultimeve Publike, ka pranuar komente të shumta nga institucione, shoqëria civile, sindikatat dhe qytetarë. Këto komente janë duke u shqyrtuar nga zyrtarët përgjegjës të Ministrisë dhe pas adresimit të komenteve, Projektligji do të dërgohet për vlerësim të ndikimit financiar si dhe për vlerësim të përputhshmërisë me ACQUI të BE-së. Projektligji do të procedohet në Qeveri për shqyrtim dhe votim pas përfundimit të këtyre procedurave”, thuhet në përgjigjen e MPB-së.
Duke marrë parasysh procedurat që duhet t’i kalojë një projektligj për të hyrë në fuqi, nga KDI-ja thonë se duhet të pritet gushti i vitit të ardhshëm që ai të bëhet i zbatueshëm.
“Marrë për bazë afatet ligjore si janë të përcaktuar me rregullore të Punës së Kuvendit unë pres që ndoshta do të vijë në Kuvend për lexim të parë nga mesi i muajit nëntor dhe eventualisht për lexim të dytë në fillimin e muajit dhjetor. Nëse mbetet dispozita kalimtare që ligji do të hyjë në fuqi 8 muaj nga dita e miratimit atëherë planifikohet nga muaji gusht 2023 të hyjë në fuqi ky ligj”, Vullnet Bugaqku – hulumtues në KDI.
Për deputetin e PDK-së, Ferat Shala, procedimi i këtij ligji është vonuar dhe efektet do të jenë edhe më të mëdha marrë parasysh shkallën e inflacionit.
“Shihni sot gjendjen e punëtorëve të arsimit si është me paga, shihni sot punëtorët e ushtrisë apo sigurisë, dikasterëve të veçantë të sigurisë dhe shihni si janë mjekët të cilët do të duhej të ndjenin sa më shpejt efektin e Ligjit të Pagave. Kur i shtojmë kësaj edhe shkallën e lartë të inflacionit, definitivisht vonesat e Ligjit të Pagave janë të paarsyeshme”, tha deputeti Shala.
Shala shton se partia e tij do ta shoh draftin final dhe analizojë amendamentet e ligjit për të vlerësuar nëse do ta mbështesë apo jo.
Së fundmi nga SBAShK-u i kanë dhënë afat Qeverisë deri në janar, që të fillojë zbatimin e Ligjit për Paga.
Kronika e gazetarit Gojart Jashari.
