Kreu i OVL-UÇK-së, Hysni Gucati, ka kritikuar mungesën e mbështetjes nga Qeveria e Kosovës dhe Lëvizja Vetëvendosje për protestën e organizuar në Hagë në mbështetje të ish-krerëve të UÇK-së.
Gucati ka thënë se përveç mungesës për përkrahje, disa individë të VV-së edhe janë përpjekur për ta penguar pjesëmarrjen e qytetarëve në protestë.
Pas protestës së nesërmve, Gucati paralajmëroi se fletushkat të cilat janë shpërndarë te qytetarët për mospjesëmarrje në protestë i ka kujtuar, madje thotë se edhe do t’i bëjë publike ato dhe emrat e individëve që i kanë shpërndarë.
“S’kemi pasur përkrahje nga Qeveria e Kosovës, përkundrazi kemi pasur pengesa e probleme. Neve na vjen keq pse VV-ja nuk na mbështet në këtë protestë, në atë të Prishtinës… e kuptojmë, por, të paktën këtu është dashur të na mbështesë. S’ka dalë fare me na mbështet. Disa njerëz prej VV-së kanë shpërnda disa fletushka, ku kanë thënë se nuk është mirë me dal me protestu. Unë i kam të ruajtura ato fletushka, madje do t’i bëj publike me emër e mbiemër ata njerëz që kanë bërë thirrje që qytetarët të mos vijnë këtu. Dje, kemi pasur një pengesë të madhe, kanë thirr njerëz në telefon dhe iu kanë thënë mos shkoni se protesta është anuluar. Kjo është e vërtetë prej VV-së, për çka që mua më vjen keq për ata njerëz që kanë rënë në kësi kurthe e ndikimi. Por, falë angazhimit të qytetarëve nuk ka ndryshuar fare. Ne kemi reaguar në momente të duhura duke thënë se kjo është gënjeshtër dhe mos bini pre e mashtrimeve. Prej qeverisë as nuk kemi ndihmë financiare as kurrfarë. Me të gjitha mundësitë tona kemi ardhur”, tha Gucati nga Haga për Tëvë1.
Ai theksoi se përpjekjet e qytetarëve kanë qenë vendimtare për organizimin e protestës, pavarësisht pengesave dhe fushatave kundër pjesëmarrjes. /teve1.info/
