Gjyqi më i madh në historinë e Kosovës, po zhvillohet pranë Dhomave të Specializuara të Gjykatës Speciale në Hagë.
Rasti më vuliminoz kundër katërshes së Ushtrisë Çlirimtare të Kosovës ka dy vite që ka nisur.
Hashim Thaçi, Kadri Veseli, Jakup Krasniqi dhe Rexhep Selimi përballë akuzave të prokurorisë për krime lufte dhe krime kundër njerëzimit, u ballafaquan me 126 dëshmitarë.
Por, Hysni Gucati që qëndroi disa muaj me katërshen, thotë që këto qindra dëshmi nuk ia zbehën krenarinë ish krerëve të UÇK-së.
“Ata gjithmonë kanë qenë krenarë, gjithmonë e kanë ditë që secili dëshmitarë që ka ardhë, ka ardhë me i keq se tjetri, secili ka ardhë me ato rrenat e veta, me ato fabrikimet e veta që i kanë bo. Ka pasë edhe prej atyne që janë tërhjek prej deklaratave, janë mundu me përmirësu, po s’kanë mujt”, thotë Gucati.
E fundi i dëshmitarëve të prokurorisë, i hap rrugë dëshmitarëve të mbrojtjes.
“Nëse s’gaboj Thaçi i ka dy dëshmitarë ndërkombëtarë që do të shkojnë të dëshmojnë në favor të tij, të tregojnë realitetin. Po ashtu, ka edhe baca Jakup, Rexha e Kadriu, nuk e di se kur do të përfundojnë, por besoj shumë shpejt”, tha ai.
Kreu i OVL UÇK-së, që një pjesë të gjyqit e pa nga afër meqë edhe vet ndodhej atë kohë në proces gjyqësor në Hagë, tregon se ish krerët e UÇK-së, nuk e kanë përjetuar mirë këtë gjyq.
Sipas tij, akuzat që rëndojnë mbi ta, janë jashtë logjike duke marrë parasysh veprimtarinë e tyre në çlirimin e vendit.
“Flas konkretisht për Nasimin, bacën Jakup e Calin që kanë qenë në burgjet e Jugosllavisë. Në atë kohë e kanë ditë pse kanë hy në burg. Se kanë hy në burg me shkatërru Jugosllavinë. Por në kohën e sotit, pse janë në burg ata? Qekjo që munden me marrë ma s’keqi, ma s’rani. Përse janë ata në burg? Se e çliruan burgun e vet?”, tha ai.
Gucati shprehet optimist se është çështje muajsh deri në dhënien e verdiktit lirues për ta.
“Fundi i vitit ose fillimi i janarit të vitit të ardhshëm, unë besoj shumë se do të jepet verdikti, që do të jepet për këta burra. Unë gjithmonë t’u besu në Zot së pari, t’u besu në drejtësi , që këta burra të mëdhaj të vendit do të dalin faqebardhë dhe do të lirohen të gjithë”.
Me përfundimin e dëshmitarëve të saj, prokuroria pritet që në vijim ta mbyllë çështjen e saj.
Në lidhje më këtë, është caktuar edhe një konferencë për ecurinë e çështjes.
