Paneli i Gjykatës Supreme në Dhomat e Specializuara në Hagë ka hedhur poshtë kërkesat për mbrojtje të ligjshmërisë, të paraqitura nga Hysni Gucati dhe Nasim Haradinaj.
Kryetarja e Gjykatës Speciale, Ekaterina Trendafilova, gjykatësja Kristinë van den Vajngart dhe gjykatësi Daniel Fransen, fillimisht refuzuan kërkesën për mbajtjen e një seance gojore, të cilën e konstatuan “të pathemeltë”.
Gjykata ka njoftuar se paneli e ka refuzuar edhe kërkesën e Gucatit që Dritan Goxhaj të përfshihet si palë e tretë në këtë proces.
Paneli ka konstatuar se Gucati nuk ka të drejtë ligjore ta paraqesë këtë kërkesë dhe shtoi se “Nuk i takon Gucatit të kërkojë të mbrojë interesat e perceptuara të një të akuzuari tjetër në kuadër të kërkesës së vet”.
Gucati dhe Haradinajn parashtruan nga shtatë kërkesa të cilat pastaj u rrëzuan nga paneli me konstatimin se nuk është bërë shkelje e së drejtës penale dhe as shkelje thelbësore e procedurave nga ana e Trupit Gjykues dhe Panelit të Gjykatës së Apelit.
Ish-drejtuesit e Organizatës së Veteranëve të Luftës së UÇK-së ndodhen në paraburgim në Hagë prej shtatorit të vitit 2020.
Më 18 maj të vitit 2022 ata u shpallën fajtor për pengim të administrimit të drejtësisë dhe u dënuan me nga katër vjet e gjysmë burgim, duke llogaritur kohën e kaluar në paraburgim.
Ndërsa në muajin shkurt të këtij viti Gjykata e Apelit në Dhomat e Specializuara të Kosovës vendosi të ulë dënimet vetëm për tre muaj./KP/
