Më shumë se 100 organizata jofitimprurëse ndërkombëtare, përfshirë Oxfam, Mjekët pa Kufij dhe CARE, akuzuan Izraelin për përdorim të ndihmës humanitare si armë dhe përpjekje për të kontrolluar grupet e pavarura të ndihmës që punojnë në Gaza dhe Bregun Perëndimor.
Në një letër të përbashkët, grupet thanë se rregullat e reja të regjistrimit – që kërkojnë dorëzimin e listave të donatorëve dhe stafit palestinez – rrezikojnë sigurinë dhe pavarësinë e tyre, duke shkelur edhe ligjet ndërkombëtare të privatësisë, shkruan AP.
Masat e regjistrimit ishin “të hartuara për të kontrolluar organizatat e pavarura, për të heshtur avokimin dhe për të censuruar raportimin humanitar”, thanë ata
Që nga marsi, shumë prej këtyre organizatave nuk kanë mundur të dërgojnë asnjë kamion me ndihmë në Gaza, ku situata humanitare është katastrofike: mijëra të vrarë, miliona të zhvendosur dhe uria në rritje.
Izraeli i mohoi akuzat, duke pretenduar se Hamasi po përfiton nga ndihma. Ndërkohë, kontraktori amerikan i njohur si Fondacioni Humanitar i Gazës, i mbështetur nga SHBA dhe Izraeli, është kritikuar pasi qindra palestinezë janë vrarë pranë pikave të tij të shpërndarjes së ushqimit.
Organizatat kërkojnë heqjen e kufizimeve dhe mbrojtje të ndihmës si një e drejtë bazë humanitare./teve1
