Deputeti i Partisë Demokratike e Kosovës, Përparim Gruda, ka folur në një konferencë për media lidhur me situatën e krijuar pas dështimit të zgjedhjes së presidentit të vendit dhe shpërndarjes së Kuvendit të Kosovës.
Ai theksoi se Kuvendi nuk arriti ta zgjedhë presidentin brenda afatit të përcaktuar nga Kushtetuta dhe se, sipas tij, shpërndarja e institucionit dhe dekreti i presidentes janë në përputhje me rendin kushtetues.
“Kuvendi i Kosovës ka konsumuar të drejtën e tij për të zgjedhur Presidentin brenda afatit kushtetues. Për pasojë, shpërndarja e tij dhe dekreti i Presidentes janë plotësisht në përputhje me Kushtetutën e Republikës së Kosovës”, tha Gruda.
Sipas tij, në doktrinën kushtetuese evropiane ekziston parimi që ndalon përfitimin nga mosveprimi institucional, duke theksuar se zgjedhja e presidentit është një detyrim kushtetues dhe jo një kompetencë diskrecionale.
“Kompetenca për zgjedhjen e Presidentit nuk është diskrecionale, por një detyrim pozitiv kushtetues. Mosnisja e procedurës përbën një mosveprim kushtetues institucional që bllokon krijimin e një organi të shtetit”, deklaroi Gruda.
Ai shtoi se interpretimi sipas të cilit Kuvendi mund të shmangë shpërndarjen duke mos e nisur fare procedurën për zgjedhjen e presidentit është në kundërshtim me logjikën kushtetuese dhe me parimin e efektivitetit të Kushtetutës.
“Nëse pranohet se shpërndarja ndodh vetëm pas votimit të tretë, atëherë Kuvendi mund të mos e thërrasë kurrë seancën dhe të zgjasë mandatin përtej parashikimeve kushtetuese. Kjo bie ndesh me parimin e efektivitetit të Kushtetutës”, tha ai.
Gruda theksoi se dispozitat kushtetuese nuk duhet të interpretohen në mënyrë që të mundësojnë bllokimin e institucioneve përmes mosveprimit.
“Dispozitat kushtetuese nuk mund të interpretohen në mënyrë që lejojnë neutralizimin e tyre përmes mosveprimit institucional. Përndryshe, do të krijohej mundësia e një bllokimi të përhershëm institucional”, theksoi Gruda.
Në fund, ai deklaroi se sipas vlerësimit të tij Kuvendi ka shkelur Kushtetutën përmes mosveprimit dhe se pasojë e kësaj situate është shpërndarja e tij dhe organizimi i zgjedhjeve të reja.
“Presidentja ka vepruar tërësisht në përputhje me Kushtetutën duke ushtruar kompetencat e saj për shpërndarjen e Kuvendit dhe pritet që së shpejti të caktohet edhe data e zgjedhjeve”, përfundoi Gruda./teve1.info/
