Brajan Gruda mund të jetë risia e madhe te Kombëtarja e Shqipërisë, pasi Alban Bushi në një intervistë për mediumet në Tiranë, ka insistuar se futbollisti ka premtuar se do të jetë pjesë e kuqeqinjëve nëse nuk merr ftesë nga Gjermania.
Gruda që është pjesë e Brightonit të Premier Leagues, është në pritje të ftesës nga selektori i Gjermanisë, Julian Nagelsmann dhe nëse nuk ftohet në shtator, atëherë do të luaj për Shqipërinë.
Sipas Bushit, një futbollist si Gruda i duhet shumë Kombëtares së Shqipërisë.
“Brajan Gruda do të luajë te Shqipëria me 100% në qoftë se nuk është pjesë e kombëtares së Gjermanisë A. Në momentin që nuk është pjesë e saj, ai do të përfaqësojë Shqipërinë. Ky ka qenë bashkëbisedim, kontakt ose le të themi, ne kemi bërë takimet me familjen e tij”, është shprehur Bushi.
21-vjeçari ka luajtur për të gjitha gjeneratat e reja të Gjermanisë kurse me ekipin U21 ka 14 paraqitje dhe 2 gola të shënuara.
Ai ende nuk ka luajtur për ekipin A të Gjermanisë, ndonëse ishte në listën e zgjeruar për “Euro 2024” dhe ishte në përgatitje por u detyrua të largohet nga kampi për shkak të lëndimit.
Gruda verën e shkuar iu bashkua Brightonit nga Mainzi për 30 milionë euro dhe me ekipin anglez ka kontratë deri në vitin 2028.
Në sezonin e tij të parë në Premier League, Gruda ka shënuar 1 gol dhe ka bërë 4 asistime në 21 ndeshje të luajtura me fanellën e Brightonit.
