Rrustem Gudaqi po e kujton vëllanë Ekremin që ra në frontin e lirë gjatë luftës së fundit në Kosovë.
Gudaqi, përveç vëllait në masakrën e Stagovës së Kaçanikut humbi edhe nënë e të birin ende pa mbushur 7 vjet.
“Më 21 maj 1999 në orët e hershme të mëngjesit ka filluar gjithë ajo altreri e tyre që janë vërsul mbi popullatën civile më shumë. Prej familjes tonë kam vëllanë dëshmorë Ekrem Dugaqi, kam djalin 7 vjeç, kam nënën 77 vjet edhe vajza e dëshmorit Ekrem Gudaqit ka qenë e plagosur në gjoks e që është gjallë e mirë tash, kam edhe gruan e plagosur që duke tentuar të mbrojë fëmijën nuk mundi të mbrojë atë”, ka thënë Rrustem Gudaqi.
Gudaqi, i ka të freskëta sikur se sot momentet e fundit me familjarët, që nuk i pa më.
“Momentet e fundit më kujtohen, kur i kam thanë vëlla mere nënën se e kam pas të paralizuar, merre popullata civile le të largohet andej hekurudhës që mos te kemi të bëjmë ne me popullatën civile. Edhe momentin kur e ka marr nënën në shpin se ka qenë e paralizuar për nja dy kilometra në anën tjetër të hekurudhës aty gjuajtjet e para ishin kanë ardh prej Vitisë e janë has popullata drejt e në të”, është shprehur Gudaqi.
Nën emocione ai tregon se si familje ishin të gatshëm të gjithë të flijohen për lirin e vendit.
“Kemi qëndruar këtu edhe pse stacionin e trenit e kemi pas dy minuta, kam bajt fëmijët ë tjerë që e kanë lëshuar vendin, këta nuk kanë dashur me lëshuar vendin, ne s’kemi dashtë asnjë me i lëshuar trojet tona edhe jemi përgatit edhe për më shumë. Po, fati deshi vetëm këta me i marrë. E në mbrëmje kur jam taku, gruaja më tha qeta jemi, it hash boll paskemi shpëtuar jemi përgatitë për krejt shyqyr Zotit boll paskemi shpëtuar”, ka thënë tutje Gudaqi.
Atë e brengos fakti se si ende edhe pas 26 vitesh askush nuk është dënuar për këtë vepër makabër që bëri armiku serb mbi civilët por edhe duke djegur e shkatërruar gjithçka që i dilte para.
“Ende askush për këtë masakër nuk është dënuar, kështu që inshalla do Zoti drejtësisë të shkoj në vend, ne e presim ditën që të dalin para gjyqit kryesit e veprës se kjo ka qenë popullatë civile. Lufta ka qenë luftë, shyqyr Zotit e fituam lirinë se kemi mundur te luftojmë e të mos e fitojmë lirinë, po kjo është bë. Janë kanë : shkolla, ambulancë, xhamia, me të gjitha janë kanë, por kanë mbete 10/15 shtëpi pa u djegë”, ka përfunduar Gudaqi.
Në masakrën e Stagovës u vranë e u masakruan plot 13 civilë të këtij fshati.
E në nderim të këtyre komuna e Kaçanikut së bashku në bashkëpunim me OVL-në e UÇK-së, në Stagovë mbahej manifestim përkujtimor.
Të rënët për liri i vlerësoi lartë edhe kryetari i Komunës së Kaçanikut, Besim Ilazi.
“Jemi mbledhur sot për të kujtuar dy dëshmorët që ranë në këtë vend një në fshatin Runjevë, Kemal Thaçi dhe në fshatin Stagovë, Ekrem Gudaqi, të njëjtën kohë kujtojmë me respektin më të madh edhe martirët e vendit e kombit të cilët u bënë simbol i lirisë të cilën sot po e gëzojmë”, ka thënë Ilazi.
Masakrën në Stagovë e përkujtoi edhe e para e shtetit Vjosa Osmani duke thënë se kjo ditë mbetet simbol i dhimbjes dhe qëndresës.
