Po i shikojnë detajet e fundit para fluturimit.
Por, ajo që e panë udhëtarët në aeroportin e Frankfurtit të hënën i befasoi.
Kjo meqë të gjitha fluturimet e tyre, ishin anuluar.
Krejt kjo pasi punonjësit e operimeve në 13 aeroporte në Gjermani, hynë në grevë një ditore.
“E kuptoj pse po mbajnë grevë, çfarë duan dhe për çfarë po luftojnë, por është e vështirë kur je e varur nga fluturimi dhe duhet të organizosh gjithçka. Është e vështirë”, ka deklaruar një qytetare nga Gjermania.
“Mendoj se nuk është mirë. Nuk mendoj se kjo është e drejtë. Po, ligjërisht është e drejtë greva, por jo të behët pa paralajmërim”, tha Ole.
Sindikata “VERDI” në Gjermani, nuk gjeti gjuhën e pajtimit me punëdhënësit, nga të cilët kërkuan një rritje prej 8 për qind të pagave ose së paku 350 euro më shumë në muaj.
E kjo bëri që të hënën anulim të fluturimeve, të ketë edhe në Aeroportin Ndërkombëtar “Adem Jashari” në Prishtinë.
Këtë fat e patën fluturime drejt Berlinit, Shtutgartit e Minihenit.
Por, jo edhe ai në drejtim të Nurembergut.
“Për shkak të grevës në disa nga aeroportet e Gjermanisë, ne aeroportin tonë janë anuluar 4 fluturime në nisje. Meqenëse këto kanë qenë anulime të planifikuara, nuk kanë shkaktuar ndonjë tollovi në aeroportin tonë. Gjatë pjesës tjetër të ditës nuk kemi fluturime tjera të planifikuara për Gjermani”, ka deklaruar Valentina Gara – zëdhënëse në Aeroportin e Prishtinës.
Të njëjtin fat e patën edhe fluturimet nga Gjermania, që të hënën do të ateronin në Prishtinë.
Ndryshe, greva pritet të vazhdojë edhe këtë javë në disa qytete të tjera në Gjermani.
