Punëtorët teknik dhe ata të sigurimit të Universitetit të Prishtinës dhe Qendrës së Studentëve, nga sot kanë hyrë në grevë për shkak të pakënaqësisë me pagat.
Përfaqësuesi i Sindikatës së Sektorit Privat, Rizah Shala, tha se përkundër kërkesave që kanë bërë, sekretari i UP-së, Besfort Krasniqi, u ka kthyer përgjigje duke u thënë se s’kanë mjete më shumë, derisa nga Ministria e Arsimit, s’kanë pasur reagim fare.
“Ne kemi dërguar shkresë në Ministrinë e Arsimit, mirëpo sekretari i UP-së ka thënë që s’kanë mjete më shumë. Nga Ministria e Arsimit, s’kanë kthyer asnjë përgjigje. Ne nuk do të pajtohemi me asnjë rritje tjetër, përveç asaj që kemi kërkuar, sepse duke e ditur inflacionin në Kosovë, nuk ia vlen”, deklaroi Shala në emisionin “Ditari”.
Ndërkaq, i pyetur se sa do të zgjasë kjo grevë, Shala tha se derisa të ketë reflektim nga menaxhmenti i UP-së dhe Ministria e Arsimit, greva do të vazhdojë qoftë edhe me muaj të tërë.
“Derisa të reflektojnë menaxhmenti i UP-së dhe Ministria e Arsimit, ne nuk e ndalim grevën. Do të zgjasë me ditë, me javë e muaj, por përsëri s’do të dorëzohemi. Çfarëdo mase të marrin, neve më keq nuk na ndodhë”, shtoi tutje ai në Tëvë1.
Këta punëtorë të sektorit privat punojnë përmes kompanive që kontraktohen nga UP për ofrim të shërbimeve.
Kërkesa e tyre është që të marrin së paku 405 euro në muaj, për shkak të rritjes së çmimeve./teve1.info/.
