Dhjetë minatorë kanë kërkuar ndihmë mjekësore gjatë natës të së dielës, në ditën e shtatë të grevës.
Nënkryetari i Sindikatës së Minatorëve të Trepçës, Destan Kërleshi, për teve1.info ka bërë të ditur se dy prej minatorëve janë dërguar në spital, ku njëri prej tyre ka qenë pa vetëdije.
“Gjendja e minatorëve është rënduar, dhe po rëndohet dita ditës. Minatorët do që qëndrojnë në grevë deri në realizimin e kërkesave. Gjatë natës dhjetë minatorë kanë kërkuar ndihmë mjekësore pasi që iu është përkeqësuar gjendje shëndetësore. Dy janë dërguar në emergjencë e që njëri ka qenë pa vetëdije”, tha Kërleshi.
Minatorët e minierës së “Trepçës” kanë hyrë në grevë si shenjë proteste për vonesat që po u bëhen në ekzekutimin e pagave.
Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve.
Kryetari i Sindikatës së Minatorëve, Ibrahim Jonuzi, për teve1.info tha se edhe sot janë në grevë minatorët.
“Minatorët nuk dorëzohen. Do të qëndrojnë në grevë deri në realizimin e kërkesave”, tha ai.
Gjatë ditës së djeshme, Jonuzi ka ftuar kryeministrin Albin Kurti që t’i vizitojë minatorët dhe më pas t’ua bëjë një zgjidhje./teve1.info/
