Amerikani i Golden Eagle Yllit, Quade Green është shpallur lojtari më i mirë për xhiron e 12-të në Superligën e Kosovës në basketboll.
FBK-ja, të hënën ka bërë të ditur se Green e ka fituar çmimin “MVP i Javës” pas paraqitjes së mirë që e pati në fitoren e Yllit ndaj Bashkimit në Prizren.
Me 30 pikë, 2 kërcime e po aq asistime, Green jo vetëm që është shpallur më i mirë, por është përfshirë edhe në pesëshen më të mirë të javës.
Krahas tij, në “Top 5”, kanë zënë vend edhe Jonathan Galloway e Tristan Ipke të Pejës, pastaj Jason Jitoboh i Vëllaznimit dhe Dardan Kapiti i Trepçës.
Galloway realizoi 11 pikë e 18 kërcime, ndërsa Ikpe shtoi 11 pikë e 9 kërcime në fitoren e thellë të Pejës ndaj Sigal Prishtinës.
Jitoboh udhëhoqi Vëllaznimin në triumfin ndaj Borës me 14 pikë e 5 kërcime, ndërsa Kapiti regjistroi “double-double” me 11 pikë e 10 kërcime në fitoren kundër Proton Cable Prizrenit.
