Dymbëdhjetë komunave të Kosovës që kanë treguar performancë të lartë në fushën e energjisë, do t’u ndahen këtë vit 7.7 milionë, tha të mërkurën ambasadori i Bashkimit Evropian në Kosovë, Aivo Orav, në kuadër të konferencës për Grantin e Performancës Komunale.
Orav tha se grantet e performancës komunale përmirësojnë qeverisjen në nivel lokal.
“Mendoj se këtu është mundësia për të theksuar pse BE-ja ka investuar në këtë nismë, sepse grantet e performancës komunale dëshmojnë se përmirësojnë qeverisjen në nivelin lokal. Ato shtrihen përtej investimeve kapitale në nivelin komunal. BE-ja, bashkë me Zvicrën dhe Suedinë, thekson rëndësinë e trajtimit të drejtë të të gjitha komunave. Të gjitha fondet, të mundësuara nga donatorët apo përmes rialokimeve të buxhetit kombëtar, duhet të transferohen drejtpërdrejt te komunat. Në këtë mënyrë, komunat mund të menaxhojnë burimet në përputhje me prioritetet e tyre lokale dhe procedurat e brendshme,” tha ai.
Ndërkaq, drejtori për Evropën Lindore në “Helvetas”, Matthias Herr tha se forcimi i qeverisjes lokale është thelbësor për të ardhmen evropiane të Kosovës.
“Është shumë e rëndësishme që forcimi i qeverisjes lokale të jetë jo vetëm një prioritet i brendshëm, por gjithashtu thelbësor për të ardhmen evropiane të Kosovës. Komuna të forta, transparente dhe të përgjegjshme janë çelësi për përmbushjen e shumë kërkesave të procesit të anëtarësimit në BE. Përparimi në nivel lokal është përparim për Kosovën si një tërësi në rrugën e saj drejt anëtarësimit në BE. Sot gjithashtu kërkojmë me respekt nga Qeveria e Kosovës që të mbetet e vendosur në angazhimin e saj për fuqizimin e komunave dhe të vazhdojë të ndërtojë mbi një partneritet të provuar. Ne kërkojmë nga qeveritë lokale që të sigurojnë që investimet të arrijnë në të gjitha lokalitetet dhe që asnjë komunitet, pavarësisht sa i vogël apo i margjinalizuar, të mos lihet pas,” shtoi ai.
Komunat përfituese të këtij granti janë: Dragashi, Drenasi, Istogu, Juniku, Kaçaniku, Klina, Lipjani, Mamusha, Mitrovica e Jugut, Parteshi, Prizreni dhe Suhareka. /kp
