Sipas tij, Këshilli Koordinues ka dhënë informacione të mjaftueshme për njerëzit e kidnapuar me dhunë.
“Ne kemi mbajtur takime edhe me Natasha Kandiqin, por nuk kemi mundur ta marrim atë që ne kemi pasur nevojë. Ne kemi dhënë informacione që deri ku dhe si ka shkuar puna me njerëzit e kidnapuar me dhunë”, tha Grajqevci mbrëmë në emisionin “Infonata” në Tëvë1.
Sipas tij, çështja e personave të zhdukur është anashkaluar edhe në të kaluarën nga krerët e shtetit.
“Edhe tani nga tre përfaqësuesit e shtetit, por edhe në të kaluarën nuk është bërë sa duhet për personat e zhdukur të krimeve të luftës, sepse të gjithë i kanë anashkaluar. Këshilli Koordinues është një bagazh që ka mbledhur të gjitha dëshmitë”, tha ai.
Gjithashtu, në diskutim e sipër për formimin e komisionit për personat e zhdukur, ai tregoi kur në vitin 2000 kanë arritur t’i zbulojnë 650 varreza masive në Kosovë.
“Në fatkeqësinë tonë ka qenë kur qeveria e përkohshme e ka formuar një komision për personat e zhdukur nga krimet e luftës, ai ka zgjatur 1 vit. Pastaj, me ardhjen e UNMIK-ut në Kosovë në vitin 2000, e kanë ndërprerë mandatin, dhe ne brenda asaj kohe kemi arritur t’i zbulojmë 650 varreza masive në territorin e Kosovës, pa përjashtuar varrezat masive në Serbi”, tha tutje Grajqevci.
