Ahmet Grajqevci nga Këshilli Koordinues i Familjarëve të të Zhdukurve, vlerësoi që çështja e personave të zhdukur tashmë është bërë politike dhe nuk është më humanitare siç do duhej të ishte.
Në Ditën Ndërkombëtare të viktimave të zhdukjes me forcë, Grajqevci e krahasoi Qeverinë Kurti me atë të Millosheviqit, derisa shtoi që nuk ka aspak shpresë që Serbia do të bëjë diçka pozitive në çështjen e personave të zhdukur, shkruan teve1.info.
“Çështja e personave të zhdukur është bërë politike tanimë, nuk është më humanitare. Bashkësia Ndërkombëtare e di që Kosova nuk e ka fuqinë të bëjë trysni më të madhe ndaj Serbisë për t’i gjetur personat e zhdukur. Me Serbinë nuk do të merremi vesh kurrë, madje edhe ato marrëveshje që kanë bërë, shteti serb nuk do t’i nënshkruajë asnjëherë. Me këtë qeveri që kemi, të ngjashme sikur ajo e Millosheviqit, kurrë nuk pres që Serbia do të realizojë diçka në të mirën e çështjes së personave të zhdukur apo edhe politikisht”, deklaroi Grajqevci në emisionin “Ditari”.
I pyetur se a ka vullnet të dëshmitarëve për të treguar lokacionet e varrezave, ky i fundit bëri të ditur se disa prej tyre veçse i kanë treguar haptazi, teksa theksoi që për lokacionet e reja do të tregojnë gradualisht.
Madje, Grajqevci vlerësoi që Serbia është shumë e përkëdhelur nga Bashkësia Ndërkombëtare.
Në shënim të Ditës Ndërkombëtare të viktimave të zhdukjes me forcë, në përkujdesjen e Zyrës së Kryeministrit të Republikës së Kosovës, Komisionit Qeveritar për Persona të Zhdukur dhe Këshillit Koordinues të Asociacioneve Familjare të të Zhdukurve të Kosovës, paradite u bënë homazhe dhe u vendosën lule te përmendorja dedikuar të zhdukurve me dhunë gjatë luftës në Kosovë./teve1.info/
