Ish-deputeti i Lidhjes Demokratike të Kosovës, Blerim Grainca, ka kritikuar kryetarin e partisë, Lumir Abdixhiku, duke thënë se ai po e dëmton LDK-në dhe po pengon zhvillimin dhe unitetin e saj.
Sipas Graincës, kërkesa për dorëheqjen e Abdixhikut nuk vjen vetëm nga nënkryetarja tashmë e dorëhequr, Hykmete Bajrami, por nga struktura të gjera brenda partisë.
“Abdixhiku po e dëmton LDK-në duke penguar zhvillimin e mëtejshëm të partisë dhe duke e penguar unitetin e saj. Nuk është vetëm Bajrami që ka kërkuar dorëheqjen e tij, por janë struktura të tëra, njerëz në terren, në degë e nëndegë dhe aktivistë të kamotshëm që kërkojnë të respektohet institucioni i përgjegjësisë”, ka deklaruar Grainca në emisionin “Mesditë” në Tëvë1.
Ai ka theksuar se në LDK përgjegjësia politike ka qenë gjithmonë parim themelor, duke shtuar se në rast të rezultateve të dobëta zgjedhore, përgjegjësia bie mbi kryetarin dhe rrethin e tij të ngushtë.
“Nëse rezultatet janë të mira, meritat i takojnë liderit. Por në këtë rast, ku kemi një rezultat që është debakël për LDK-në, padyshim që përgjegjësinë e mban kryetari i partisë dhe ekipi i tij i ngushtë”, ka shtuar ai.
Këto deklarata vijnë pas dorëheqjes së parevokueshme të Hykmete Bajramit nga posti i nënkryetares së LDK-së, e cila njëkohësisht ka kërkuar dorëheqjen e Lumir Abdixhikut dhe organizimin e zgjedhjeve të brendshme partiake, duke theksuar se lidershipi aktual ka humbur legjitimitetin pas rezultateve të 28 dhjetorit.
