Policia e Kosovës njoftoi të shtunën se rasti është në procedurë hetimore.
Qytetarët e Shtimes kanë mendime të ndryshme lidhur me atë se kush i solli Z-jat në qytetin e tyre.
“Mund të ndodh që kanë ardhë se kemi edhe Lipjani ku jetojnë serbët në Lipjan për shembull. Është edhe Çagllavica e Graçanica janë ngat prej Shtimes. Nuk është 20 kilometra. Ka mujt me ndodh me ardh ba si simbol edhe me simbolizu një far, me i hi edhe njerëzve në kry ky far gjesti. Kjo është e keqe çka ka ndodh”, thotë Gëzim Brahimi, qytetar nga komuna e Shtimes.
“Ky simbol është naj bashkëpunëtor i tyne, thjesht. Rusi ka shti pare tona ant në Kosovë e në botë dhe ashtu tu e ba qet të zezë”, është shprehur qytetari Hafir Haziri.
Sipas ligjëruesit universitar të lëndëve të sigurisë, Fatmir Çollakut, grafite të tilla nënkuptojnë se një strukturë e caktuar është e interesuar për destabilitet. Ai nuk e përjashton që këto shkrime të jenë të mbështetura nga Serbia.
“Mund të jenë edhe individuale por mund të jenë edhe të suportuara apo të mbështetura nga qarqe të caktuara. Skenarë të ndryshëm të Serbisë kanë qenë në kontinuitet për destabilizim të Kosovës me rituale të ndryshme, me parulla e afishe të ndryshme prandaj për mua, në vazhdën e këtij skenari mund të jenë edhe këto shkrime e këto grafite. Por nuk përjashtohet mundësia që individë të caktum me prirje nacionaliste e destruktive mund të shënojnë dhe të përcjellin mesazh se janë përkrahës të Rusisë dhe pushtimit të Ukrainës”, ka thënë ligjëruesi i lëndëve të Sigurisë, Fatmir Çollaku.
Ndryshe simboli Z para disa ditësh u pa i shkruar edhe në një ndërtesë në Mitrovicën e Veriut, komunë kjo me shumicën e popullsisë serbe.
Kronika e realizuar nga gazetari Gojart Jashari.
