Një grabitje e pazakontë ka ndodhur mbrëmjen e së enjtes në Rahovec, ku tre persona të dyshuar kanë hyrë në një kompani private dhe kanë sulmuar rojen e sigurisë.
Sipas raportit të Policisë së Kosovës, ngjarja ka ndodhur rreth orës 21:00, kur tre persona të maskuar, njëri prej tyre i armatosur me armë të shkurtër, kanë hyrë në oborrin e kompanisë ku ndodhej roja i sigurisë.
“Ankuesi mashkull kosovar ka njoftuar policinë se derisa ishte në vendin e punës, roje në një kompani private, aty kanë hyrë tre persona të dyshuar – njëri me armë të shkurtër – dhe pasi e kanë lidhur viktimën për një pemë në oborr, të dyshuarit kanë depërtuar përmes dritares në objekt,” thuhet në raportin e Policisë së Kosovës.
Aktualisht nuk dihet se çfarë kanë arritur të marrin nga objekti, ndërsa viktima nuk ka raportuar lëndime fizike.
“Viktima nuk ka deklaruar lëndime, kurse në konsultim me prokurorin është iniciuar rasti ‘Grabitje’ dhe janë nisur hetimet për identifikimin e të dyshuarve,” përfundon raporti i policisë.
