Është nga qendrat tregtare me të frekuentuara në vend.
E pikërisht hyrja e saj e mbuluar me kamera të hënën u kthye në një arenë dyluftimi.
Katër persona të armatosur rëndë, hasën në rezistencën e pjesëtarëve të sigurimit që po transferonin para me këtë furgon.
Nga të shtënat me armë, i plagosur mbeti njëri nga pjesëtarët e sigurimit dhe njëri nga grabitësit.
Pavarësisht se e gjithë ngjarja ndodhi afër këtij mjeti nga kompania “Besa Security” kanë thënë se furgoni i tyre nuk ishte cak i grabitësve.
Së ekipi i tyre mund të ketë qenë shenjetësr, e kanë mohuar edhe nga kompania “Istanbul Ozel Guvenlik”.
Njëri nga grabitësit që përfundoi i plagosur, është Millosh Vukojeviq nga Leposaviqi.
Për këtë rast, Tëvë1 i është drejtuar Prokurorisë Themelore në Prishtinë.
Këtu Tëvë1 ka pyetur nëse sulmi ka elemente të veprës terroriste.
Nga organi i akuzës, kanë thënë se janë duke vepruar me një nguti të posaçme për arrestimin e 3 të dyshuarve të tjerë.
“Lidhur me pyetjen tuaj ju njoftojmë, se Prokurori i çështjes brenda afatit ligjor do të parashtron kërkesën për caktimin e masës së paraburgimit ndaj një (1) personi i cili po dyshohet se e ka kryer veprën penale ”Grabitja” sipas nenit 317 dhe ”Mbajta në pronësi, kontroll ose posedim të paautorizuar të armëve” sipas nenit 366 të Kodit Penal të Republikës së Kosovës. Ndërsa sa i përket personave të tjerë në bashkëpunim me organet e Policisë Prokuroria Themelore në Prishtinë janë duke vepruar me një nguti të posaçme për arrestimin e tre (3) personave të dyshuar të cilën ndodhen në arrati”, thuhet nga Prokuroria Themelore.
Por, a mund të përballet Kosova me një sulm të mundshëm terrorist, në një kohë kur Serbia po përballet me protestat më masive.
“Na mungojnë ato që policia dhe agjensonet i kanë në dispozicion, janë të vetmit ata që mund të flasim për motivet. Mirëpo neve na lejohet të flasim parimisht mbi përvojën tonë dhe zakonisht aktet terroriste ndodhin në vende ku krijohet panik e pasiguri, veprime të cilat krijojnë efekte dhe në ALBI MALLL ku ka frekuentim të madh ditor të qytetarëve, mund të jetë cak edhe i një aksioni të tillë”, thotw Fadil Kajtazi, ekspert i sigurisë.
Kajtazi ka kërkuar nga organet e sigurisë në Kosovë, të jenë sa më vigjilente.
“Për momentin serbët kanë hequr dorë nga një aksion masiv ushtarak në drejtim të Kosovës, për shkak të pranisë së NATO-së, dhe që pas vitit 2000 ata vazhdojnë ta sabotojnë shtetin e Kosovës dhe përdorin luftën hibride në drejtim të Kosovës. Kështu terrorizmi është njëra nga format e luftës hibride, e cila për qëllim arritjen e objektivave përmes asaj që është veprim asimetrik”, shprehet Kajtazi.
Vetura më të cilën po udhëtonte Millosh Vukojeviq me shokë, u gjet e djegur tërësisht në Hajvali të Prishtinës.
