Google po paditet në Mbretërinë e Bashkuar për deri në 5 miliardë funte dëmshpërblim për akuzat se ka mbyllur konkurrencën në tregun e kërkimit në internet dhe ka abuzuar me këtë dominim për të mbajtur çmime më të larta për reklamat, raporton The Guardian.
Një padi kolektive e paraqitur në tribunalin e apelimit të konkurrencës të martën argumenton se kompania amerikane e teknologjisë ka marrë masa që i mundësojnë të ngarkojë çmime më të larta për promovimet që shfaqen në kërkimet në internet sesa mund të bëhej në një treg të ndershëm.
Padia pretendon se Google, që është në pronësi të kompanisë amerikane të teknologjisë Alphabet, ka kontraktuar prodhuesit e telefonave për të instaluar paraprakisht aplikacionin e kërkimit Google dhe shfletuesin Chrome në pajisjet Android dhe ka paguar Apple për ta bërë motorin e saj të kërkimit motorin e parazgjedhur në iPhone, me qëllimin për të mbyllur konkurrencën.
Padia është paraqitur nga eksperti i ligjit të konkurrencës Or Brook në emër të mijëra bizneseve dhe akuzon Google se ka siguruar që motorri i saj i kërkimit të ketë më shumë funksionalitete dhe veçori për ofrimin e reklamave të Google sesa ai i konkurrentëve të saj.
Një zëdhënës i Google tha: “Ky është një tjetër rast spekulativ dhe oportunist – dhe ne do ta luftojmë atë me forcë. Konsumatorët dhe reklamuesit përdorin Google sepse është i dobishëm, jo sepse nuk ka alternativa”.
Brook tha se bizneset kishin pothuajse asnjë mundësi tjetër përveçse të përdornin reklamat e Google për të reklamuar produktet dhe shërbimet e tyre.
“Regullatorët në të gjithë botën e kanë përshkruar Google si një monopol dhe sigurimi i një vendi në faqet kryesore të Google është thelbësor për dukshmërinë”, tha ajo në një deklaratë.
“Google ka shfrytëzuar dominimin e saj në tregun e kërkimit të përgjithshëm dhe atë të reklamave në kërkim për të mbajtur çmime më të larta për reklamuesit”.
Autoriteti i Konkurrencës dhe Tregjeve nisi një hetim në Mbretërinë e Bashkuar në janar për shërbimet e kërkimit të Google, duke përfshirë ndikimin e tyre në tregjet e reklamave.
Ai tha në atë kohë se miliona njerëz dhe biznese varen nga shërbimet e Google, të cilat përbënin 90% të kërkimeve dhe ishin përdorur nga më shumë se 200,000 biznese në Mbretërinë e Bashkuar për të reklamuar, hetimi i të cilit është ende në vazhdim.
