Sonte në Therandë, me fillim nga ora 18:45, do të zhvillohet një nga ndeshjet më tërheqëse të sezonit, dueli i kthimit në kuadër të çerekfinaleve të Kupës së Kosovës mes Golden Eagle Yllit dhe Trepçës.
Skuadra vendase, Golden Eagle Ylli, hyn në këtë përballje me një avantazh minimal prej tri pikësh nga ndeshja e parë, e fituar 102–99, duke e bërë edhe më interesante sfidën vendimtare për kualifikim në gjysmëfinale.
Në anën tjetër, Trepça udhëton drejt Therandës me synimin e qartë për përmbysje dhe kalim në fazën tjetër të Kupës. Mitrovicasit kërkojnë një paraqitje të fortë, duke u mbështetur në cilësinë dhe përvojën e skuadrës.
Kjo përballje cilësohet si superderbi, pasi të dyja ekipet konsiderohen se posedojnë rosterët më të kompletuar dhe më cilësorë në basketbollin kosovar, çka garanton intensitet të lartë dhe emocione deri në fund.
Gjithçka është gati për një mbrëmje të zjarrtë basketbolli në Therandë, ku vetëm njëra skuadër do të sigurojë biletën për gjysmëfinale të Kupës së Kosovës.
