Një 27-vjeçare ka marrë lëndime të rënda pasi është goditur nga vetura të martën në fshatin Qyshk, në magjistralen Pejë – Prishtinë.
Inspektoriati Policor i Kosovës ka njoftuar se lidhur me këtë rast ka arrestuar një zyrtar policor nën dyshimin se ka shkaktuar aksidentin.
Në njoftim thuhet se zyrtari policor ka qenë i përfshirë me veturë civile dhe jashtë detyrës zyrtare.
“IPK është informuar nga Policia e Kosovës për një aksident me lëndime të rënda trupore në rrugën magjistrale Prishtinë – Pejë në fshatin Qyshk, ku në aksident është i përfshirë një zyrtar policor me veturë civile dhe jashtë detyrës zyrtare. Aksidenti raportohet të ketë ndodhur sot rreth orës 16:00 ku janë përfshirë një automjet (të cilën ishte drejtuar zyrtari policor jashtë detyrës zyrtare) dhe një këmbësore. Pas pranimit të kësaj informate, IPK menjëherë i është përgjigjur rastit si dhe njësitet tjera relevante policore, përderisa personi i lënduar në këtë aksident është dërguar për tretman mjekësor. Bazuar në veprimet e ndërmarra hetimore të ndërmarra deri tani dhe pas përfundimit të këqyrjes së vendit të ngjarjes, zyrtari policor është arrestuar me dyshimin se i njëjti ka kryer veprën penale “rrezikim i trafikut publik”, thuhet në njoftim.
Po ashtu bëhet e ditur se të njëjtit me aktvendim të prokurorit i është caktuar masa e ndalimit për 48 orë, ndërsa veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente.
Goditet nga vetura 27-vjeçarja në Qyshk të Pejës, dërgohet në QKUK
