Basketbollistja e Bashkimit, Adrienne Godbold është zgjedhur lojtarja më e mirë për xhiron e 16-të në Superligën e Kosovës.
Federata e Basketbollit të Kosovës (FBK), ka bërë të ditur të hënën se amerikanes me pasaportë kosovare, i ka takuar epiteti “MVP i Javës” pas paraqitjes fantastike që e pati ndaj Prishtinës.
Godbold e udhëhoqi Bashkimin drejt fitores me “double-double” prej 26 pikëve e 13 kërcimeve, ndërsa shtoi edhe 8 asistime.
Kjo performancë, ka siguruar që Godbold të përfshihet edhe në ekipin e javës, pjesë e të cilit është edhe bashkëlojtarja e saj, Aulona Muhadri që regjistroi 8 pikë, 14 kërcime e 4 asistime.
Nicole Terry e Jeta Zeka të Penzës, po ashtu janë në ekipin më të mirë pasi ndihmuan ekipin ta fitoj ndaj Junior 06.
Zeka pati 21 pikë, 9 kërcime e 10 asistime kurse Terry shtoi 20 pikë, 19 kërcime e 15 asistime.
Pesëshen e javës, e kompleton Calveion Landrum e Peja 03, e cila realizoi 26 pikë, 11 kërcime e 10 asistime në triumfin e ekipit të saj kundër Trepçës.
