Deputeti nga radhët e LVV-së, Gazmend Gjyshinca, ka thënë se ka dy arsyeje pse ka votuar pro themelimit të Komisionit Hetimore për rezervat shtetërore.
Ai në emisionin “Ditari” në Tëvë 1 tha se e para është se publiku duhet të informohet dhe se e dyta konsideron që nuk kanë asgjë për të fshehur.
“Unë kam qenë pro krijimit të këtij Komisioni dhe jo vetëm këtij, është në kuadër të punës së deputetit të Kuvendit të Kosovës, punë e cila përshkruhet edhe me Kushtetutën edhe me ligjet…Kjo nuk është hera e parë edhe as e fundit që Kuvendi e krijon një Komision Hetimore në lidhje me pretendime të caktuara. Në lidhje me atë që ndodhi dje unë e thash janë dy argumente kryesore për mu. E para që opinioni publik duhet që të informohet drejtë qoftë edhe përmes atyre të cilët janë të besuarit e qytetarit në këtë rast të deputetëve dhe e dyta, Kuvendi nuk do të bëjë asgjë të re nëse e themelon këtë për shkak se është themeluar edhe me herët, ne kur kemi qenë në opozitë kemi krijuar Komisione Hetimore si LVV, po ashtu pse mos të bëhet…konsiderojë dhe mendojë që nuk kemi asgjë për të fshehur, e nëse nuk kemi asgjë për të fshehur dhe jemi të pastër pse mos ta bëjmë këtë. Ka pretendim eja ta hetojmë atë.., ka deklaruar ai.
Ai ka folur edhe për mundësinë e rrëzimit të Qeverisë, ku tha se është gati e pamundur.
“E shoh si të vështirë, gati të pamundshme, për shkak se është shumë e thjeshtë kjo nuk i kanë numrat në Kuvendin e Kosovës. Është komplekse, është punë njerëzish, jo robot”, tha ai.
Ndryshe të enjten, deputetët e Kuvendit të Kosovës e kanë votuar themelimin e Komisionit Hetimor Parlamentar për rezervën shtetërore, raporton teve1.info.
Në votim kanë marrë pjesë gjithsej 75 deputetë, ku 69 prej tyre kanë qenë për dhe 1 abstenim.
Propozimin për themelimin e Komisionit Hetimor Parlamentar për rezervën shtetërore e kanë propozuar 41 deputetë nga opozita.
Teksa, lidhur me çështjen e rezervave shtetërore, është kryer bastisje nga Policia e Krimeve Ekonomike në ministrinë e Industrisë dhe Tregtisë, ku disa zyrtarë ishin arrestuar, por të njëjtin janë liruar./teve1.info./
