Shtëpia Evropiane e Futbollit – UEFA, iu ka besuar gjyqtareve nga Kosova ndarjen e drejtësisë në ndeshjen kualifikuese të Kampionatit Evropian për futbolliste.
Gjyqtaret kosovare do të gjykojnë ndeshjen mes Greqisë dhe Ishujve Faroe, e cila luhet të premten prej orës 19:00 dhe i takon Grupit 3 të Ligës C.
Rita Vehapi do të jetë gjyqtare kryesore, e ndihmuar nga asistentet Lumturie Muhadri dhe Rinesa Kryeziu. Ndërsa, gjyqtare e katërt do të jetë Festina Hoxha.
Kjo është hera e tretë që gjyqtaret nga Kosova ndajnë drejtësinë në një ndeshje të këtij niveli, ka shkruar FFK-ja të enjten.
“Suksesi i tyre është një dëshmi e fokusit të vazhdueshëm në zhvillimin e futbollit të femrave në vendin tonë, duke ndihmuar në afirmimin e vlerave të sportit dhe përkushtimit”, thuhej ndër të tjera në njoftimin e FFK-së.