Autori: Jona Kelmendi
Këtë të martë para Gjykatës Themelore në Prishtinë dolën përsëri ish-ministrat Endrit Shala dhe ish-sekretari i Ministrisë së Tregtisë, Vesel Krasniqi, të akuzuar për keqpërdorim të detyrës zyrtare.
Sipas Prokurorisë Speciale, Shala akuzohet se ka favorizuar kompaninë e baxhanakut të tij me mbi 732 mijë euro përmes një vendimi të vitit 2019, ndërsa Krasniqi akuzohet se ka shkaktuar dëm mbi 11 milionë euro buxhetit të shtetit, përmes një udhëzimi administrativ për kontrollin e naftës.
Si dëshmitar në këtë seancë ishte ftuar ish kryeministri, Avdullah Hoti, por i njëjti për arsye të panjohura nuk i është përgjigjur ftesës së gjykatës.
Ndërsa procesi gjyqësor ka vazhduar me dëgjimin e dëshmitarit Mentor Borovci, drejtor i Zyrës Ligjore në Zyrën e Kryeministrit.
I pyetur nga prokurori Milot Krasniqi për kompetencat e Zyrës Ligjore, dëshmitari Borovci tha që është njësi organizative në kuadër të zyrës së kryeministrit.
“Zyra Ligjore është njësi organizative në kuadër të Zyrës së Kryeministrit, me mandat kryesor për përgatitjen e programit legjislativ dhe bashkëpunimin me ministritë për hartimin e legjislacionit sekondar.”, është shprehur Borovci.
Ndërkohë në anën tjetër Avokati i Endrit Shalës, Besnik Berisha, kundërshtoi disa pyetje të prokurorit.
“Dëshmitarit po i parashtrohet pyetja sikur ky të ishte ekspert për çdo gjë, ndërkohë që rrethanat për të cilat është ftuar lidhen ekskluzivisht me Zyrën Ligjore dhe një opinion që ka dhënë Zyra Ligjore lidhur me udhëzimin administrativ, i cili për Prokurorinë Speciale është kontestues. Me sa e dimë, nuk është ftuar si ekspert i hartimit të legjislacionit e as si zëdhënës i qeverisë apo i organeve të tjera ligjzbatuese”, ka thënë Berisha.
E lidhur me draft-udhëzimin administrativ për kontrollin dhe cilësinë e karburanteve, dëshmitari tha se nuk i kujtohet.
“Nuk më kujtohet saktësisht jom mundu që më i grumbullu ato dëshmitë materiale që kanë pasë të bëjnë më këtë përiudhen e nxjerrjës së opinionit të zyrës ligjore edhe qysh na ka ardh kërkesa nga ana e kryeministrit por ajo pjesë është e largët edhe nuk e mbajë mend”, është shprehur tutje Borovci.
I pyetur nëse kishte raste kur Kryeministri i kishte kërkuar një ministri ta shfuqizonte një akt nënligjor dhe ministri nuk ishte bindur, Borovci sërish tha që nuk i kujtohet.
“Ka ndodhur që Kryeministri të kërkojë shfuqizimin, por rast kur ministri nuk i është bindur nuk më kujtohet”, ka përfunduar Borovci.
Ndërkaq seanca e sotme mbeti në gjysmë për të vazhduar me datat 4 dhe 5 nëntor.
