Me pranga në duar u soll në gjykatore.
Ndaj ish policit serb të Kosovës, Sladjan Trajkoviq, po vazhdon gjykimi për krime lufte ndaj popullsisë civile në fshatin Reznik të Vushtrrisë.
Kësaj radhë u dëgjua një dëshmitar nga ana e Prokurorisë Speciale.
Ai rrëfeu se si i kishin tubuar në një pjesë të fshatit ushtria dhe paramilitarët serbë.
“Na thanë nëse vetëm një gjendet nëpër shtëpia kur të kontrollojmë pastaj, do t’i pushkatojmë. Na e kishim afër dhe dolëm, aty afër sheshit, tek varrezat”, tha dëshmitari, Shefqet Binaku
Ai tregoi se si i doli përballë Sladjan Trajkoviq.
“Tu e identifikua dikë tjetër, kur e thërret ky polici, e len atë, dhe vjen furishëm në drejtim timin”, tha Binaku.
Ai tregoi për dhunën që ia kishte ushtruar tanimë i akuzuari.
“Në atë moment kur unë u mundojsha me u arsyetu, dhe nuk isha i përgatitur, madje edhe duart i kisha tek fytyra, ky me armën e tij më godet në pjesën këtu. (bën me shenjë tek pjesa e majtë e kokës)”, tha ky dëshmitar.
Dëshmitari rrëfeu edhe disa nga fjalët që i akuzuari i kishte thënë në lidhje me pushkatimin.
“Me fjalën e tij në gjuhën serbe, me thotë hala koke gjallë dhe ma shanë nanën, dhe e ngreh pushkën deri të raportimi dhe për fat temin është NATO që jam gjallë, pasi kanë bombardu dhe policët janë larguar”, tha ai.
Sipas aktakuzës, Trajkoviq po akuzohet se gjatë kohës së luftës në Kosovë, në periudhën kohore 1998-1999 në fshatin Reznik komuna e Vushtrrisë dhe në fshatrat përreth të kësaj komune, i njëjti individualisht dhe në bashkëkryerje me personat tjerë, ka kontribuar në vrasje, bastisje, rrahje, maltretime, arrestime, tortura, trajtim në mënyrë ç’njerëzore, mbajtja në kushte skllavërie, dëbimin dhe depërtimin e mijërave civilëve shqiptarë si dhe masat e plaçkitjes, djegies dhe shkatërrimit të shtëpive të popullsisë civile shqiptare.
