Prej më shumë se dy vitesh, Dibran Hoxha po përballet me një proces gjyqësor, që e ngarkon atë me vrasjen e një të riu nga Kukësi i Shqipërisë.
Rasti kishte ndodhur në lokalin ku pronar është vet Hoxha, “Kobra City”.
Për ndodhinë e 3 janarit 2023, në Gjykatën Themelore të Prishtinës ka ardhur për të dëshmuar Kujtim Gashi.
Ai kishte qenë punëtor në lokal, i pranishëm natën kritike.
Gashi i tha Prokurorisë se të akuzuarin Hoxha nuk e parë atë natë në ambientet e “Kobra Cityt”.
“Dibrani nuk ka qenë atë natë në lokal”, Kujtim Gashi.
“Domethënë nuk e ke parë fare, as para mesnate e as pas mesnate?”, u shpreh Merita Bina-Rugova , prokurore
“Pasi ka ndodhë rasti e kam pa”, ishte përgjigjeja e dëshmitarit.
Të akuzuar në këtë rast janë edhe Roland Susui, Arben Vezaj, Burim Mazreku dhe Jesmir Badalli.
Dëshmitari Gashi u pyet në detaje për përleshjen që çoi në vrasjen e rëndë.
“Kur e dëgjuat zhurmën, a nuk menduat nga kureshtja të shkoni e të shikoni se çfarë për ndodhë?, pyeti Emrush Kastrati, avokat i palës së dëmtuar.
“Jo, se unë jam njeri familjar, kam shku për një dianarë për me majt familjen, aty e jo m’u rrehë e me bo diçka”, tha dëshmitari Gashi
Dëshmitarit disa pyetje ia bëri vet, Dibran Hoxha.
“A ke vërejt najherë që kur njerëzit nuk kanë pasë me pagu apo diçka tjetër ose naj mosmarrëveshje që ka qenë, ke vërejt nëse unë kam dal i kam rrehë ose i kam dhënë urdhër njerëzve të tjerë me i rreh?, pyeti Hoxha.
“Derisa kam punu tek ti, nuk kam dëgju që ti ke rreh apo ke bo diçka. Po bile, ju ke qu pije ekstra, e ata që s’kanë pas pare me pagu, jau ke falë”, u përgjigj dëshmitari Gashi.
Të mërkurën ishte planifikuar që të dëshmonin edhe tre persona të tjerë, mirëpo ata nuk u paraqitën.
Me këta dëshmitarë, synohet të ndriçohet rasti i vrasjes së shtetasit të Shqipërisë.
Dyshimet janë se akti i rëndë ka ardhur pasi viktima nuk ishte pajtuar me faturën e lartë, duke nisur një sherr fizik me stafin e lokalit.
