“Problemet familjare duhet të zgjidhen shpejtë dhe me efikastitet. Përgjigjja jonë do të jetë themelimi i Gjykatës për Çështje Familjare”, është ky premtimi i Albin Kurtit.
Ky është njëri prej zotimeve në fushën e drejtësisë.
Gjykata e re, planifikohet të ketë në kompetencë çështjet si problemet me pronë, trashëgimi, dhunë në familje, divorce e alimentacion.
Por kjo formë e veprimit nuk po vlerësohet si e duhura.
“Dëshirojnë të krijojnë një sistem paralel ndaj drejtësisë ekzistuese. Por, në qoftë se zbatohet ligji mirë dhe drejtë, nuk ka nevojë për asnjë Gjykatë, nuk ka nevojë për asnjë prokurori, por është çështje vetëm se si duam të zbatohet ligji. Nuk mund të zbatohet ligji në bazë të kërkesave dhe nevojave politike”, ka thënë Behxhet Shala nga KMDLNj
Në rast të krijimit të mekanizmave të ri në kuadër të sistemit të drejtësisë, kërkohet që të bëhen në koordinim të plotë mes institucioneve dhe partnerëve ndërkombëtarë.
“Vlerësoj se themelimi i mekanizmave të tillë shkon në funksion të ngritjes dhe avancimit, e të trajtimit më me efikasitet rasteve. Mirëpo, megjithatë duhet një koordinim dhe bashkëveprim me të gjithë akterët relevant. Për më tepër, vlerësoj se qeveria e re nga kushdo që themelohet, në raport me sistemin gjyqësor mund t’i ndërmarrë disa hapa jashtëzakonisht të rëndësishëm, të cilët mund të shkojnë në funksion të uljes së numrit të lëndëve në sistemin gjyqësor”, vlerëson avokati Ardian Bajraktari.
Gjatë Qeverisë Kurti II, u krijua Gjykata Komerciale, derisa ajo Administrative dhe e Punës, nuk është e përfunduar.
