Kjo gjykatore mori pamje krejt tjetër si mesditën e së enjtes.
Në këtë sallë do të nënshkruhej marrëveshja mes Shteteve të Bashkura të Amerikës dhe Kosovës, për pajisje audio vizuele për gjykatat e vendit.
Pala amerikane u përfaqësua nga ndihmës sekretari amerikan i Byrosë Ndërkombëtare të Narkotikëve dhe Çështjeve të Zbatimit të Ligjit, Todd Robinson, i cili potencoi se këto pajisje sjellin shumë lehtësira për gjyqësorin.
“I nderuar të participojmë në pajisjet audio-vizuele duke ndikuar në sigurinë e gjykatës dhe burgjeve. Ka shumë benefite nga këto pajisje. Janë eliminuar letra-procesverbalet e seancave, shënohen automatikisht. Dua të falënderoj KGJK-në për bashkëpunimin e treguar në implementimin e këtij projekti”, tha zyrtari amerikan
8 salla do të kenë regjistrim për zë, figurë dhe transkriptim, kurse 83 të tjera vetëm për zë.
Këto sipas kryesuesit të Këshillit Gjyqësor, Albert Zogaj, do të ndihmojë në transparencë të gjyqësorit.
“Përmes instalimit të pajisjeve audio vizuele në të gjitha gjykatat e Republikës së Kosovës, e ndihmon në masë të konsiderueshme transparencën e gjyqësorit, e rrit besimin e publikut dhe njëkohësisht të palëve në procese gjyqësore, e rrit efikasitetin dhe ekonomizon procesin gjqyësor. Kjo pasi i mundëson palëve dhe gjykatës që në vende të ndryshme të ndjekin procese gjyqësore, veçanërisht nga Shërbimi Korrektues. E posaçërisht i jep një mbrojtje dhe siguri të veçantë për kategoritë e ndjeshme siç janë dëshmitarët dhe viktimat, tha Zogaj.
16 objekte të Shërbimit Korrektues të Kosovës do të kenë kapacitete të takimeve me video lidhje.
Si të rëndësishme e quajti këtë donacion edhe drejtori i Shërbimit Korrektues, sidomos zvogëlimin e nevojës së transportit të të burgosurve nëpër gjykata.
“Përmes këtij sistemi do të zvogëlojmë nevojën e transportit të të burgosurve nga burgjet në gjykata dhe anasjelltas, duke bërë që proceset gjyqësore të jenë më të sigurta dhe efikase”, Ismail Dibrani
Në kuadër të këtij donacione me vlerë 6 milionë euro, edhe 133 zyre të gjykatësve do të pajisen me pajisje për transkriptim.
