Gjykata Themelore në Prizren ka njoftuar për aktgjykimet që ka marrë ndaj Ferzidin Bota i dyshuar për vrasjen e nënës në Dragash.
Sipas njoftimit të Gjykatës ai më datë 15.07.2022, për veprën penale Lëndim i lehtë trupor nga neni 185 par. 3 nënpar. 3.1, të KP-së, i është shqiptuar dënim ashtu që i vërteton dënimin me burgim në kohëzgjatje prej 6 (gjashtë) muajsh i cili dënim nuk do të ekzekutohet në afatin prej 2 (dy) vitesh nga dita e plotfuqishmërisë së aktgjykimi, nëse i akuzuari nuk kryen ndonjë vepër të re penale.
Poashtu i ishte caktuar edhe masa e trajtimit të detyrueshëm psikiatrik – ambulator në liri.
Më datë 22.08.2022, është marrë aktgjykim dënues, ashtu që të pandehurit për veprën penale Dhuna në Familje, nga neni 248 par. 1 të KP-së, i është shqiptuar Dënim me Burgim, në kohëzgjatje prej 6 (gjashtë) muajve, i cili dënim nuk do të ekzekutohet nëse i pandehuri brenda periudhës verifikuese prej 1(një) viti, pasi aktgjykimi të merr formën e prerë nuk kryen vepër tjetër penale, në të kundërtën gjykata do të revokoj dënimin me kusht.
Gjithashtu, në bazë të nenit 514 par.3 të KPP-ës dhe nenit 84 par.1 nënpar.1.2. dhe 86 par.1 nën par 1.3 dhe par.4 të KPRK-ës i është shqiptuar “masa e trajtimit të detyrueshëm psikiatrik në liri”
Më datë 17.10.2024, është marrë Aktgjykim Dënues, ashtu që të pandehurit për veprën penale Lëndim i lehtë trupor nga neni 185 par. 3 nënpar. 3.1, të KP-së, i është shqiptuar dënim me burgim në kohëzgjatje prej 6 /gjashtë/ muajve, në të cilin dënim me burgim do të llogaritet edhe koha e kaluar në masën e paraburgimit nga data 30.06.2024 deri me datë 25.09.2024.
“Duke aplikuar dispozitat e nenit 3 par.2 dhe nenit 44 të KP-së, me propozimin dhe pëlqimin e të akuzuarit dhe mbrojtësit të tij, dënimi i shqiptuar me burgim në kohëzgjatje prej 6 /gjashtë/ muajve, ti zëvendësohet me dënim me gjobë. Gjykata të akuzuarit dënimin me burgim në kohëzgjatje prej 6 /gjashtë/ muajve, i zëvendëson me dënim me gjobë në shumën prej 2,000.00 € / dy mijë/ euro, në të cilin dënim me gjobë do të llogaritet edhe koha e kaluar në masën e paraburgimit nga data 30.06.2024 e deri me datë 25.09.2024, shuma e ngelur e dënimit me gjobë prej pas llogaritjes së masës së paraburgimit prej 260.00 € /dyqind e gjashtëdhjetë / euro, i akuzuari duhet ta paguaj në afat ligjor pas plotfuqishmërisë së këtij aktgjykimit”, thuhet nga Gjykata.
