Gjykata e Shkalles se Pare Vlorë, ka vendosur sot masën e sigurisë “arrest në burg” për Orest Çorapajn dhe Julian Zogajn, ndërsa ka vendosur arrest shtëpie për Vilson Agajn.
Tre të rinjtë u arrestuan më 12 dhjetor, të dyshuar si autorë të pengmarrjes së 39-vjeçarit Fisnik Xhaka, shtetas nga Kosova.
Sipas Policisë, ngjarja lidhet me një borxh të pashlyer, ndërsa Xhaka dyshohet se është mbajtur peng për rreth dy javë në një banesë në lagjen “Osman Haxhiu”, në qytetin e Vlorës.
Ne video shfaqet i riu nga Kosova së bashku me personat e arrestuar. Në pamje, ata duken duke drekuar së bashku dhe duke komunikuar në mënyrë të qetë. Sipas avokatëve mbrojtës, këto pamje tregojnë se palët njiheshin me njëra-tjetrën dhe se nuk kemi të bëjmë me një situatë pengmarrjeje.
Mbrojtja pretendon se 39-vjeçari ka ardhur në Vlorë me valixhe dhe veshmbathje personale, me qëllim që të qëndronte aty për një periudhë kohe. Gjithashtu, theksohet se denoncimi për pengmarrje është bërë nga motra e tij, e cila jeton në Suedi.
Po sipas avokatëve, i riu u kërkonte para familjarëve për të shlyer një borxh, për të cilin kishte dalë garant, dhe se rasti është keqinterpretuar si pengmarrje.
Nga kontrollet e Policisë Gjyqësore, në banesën ku mbahej peng 39-vjeçari, është gjetur edhe valixhja me rrobat personale, fakt që sipas mbrojtjes mbështet pretendimin se ai kishte shkuar aty me dëshirë për të qëndruar.
Edhe pse në pamjet filmike nuk dallohet qartë data dhe ora e regjistrimit, videot tregojnë se personat komunikojnë lirshëm dhe duken të njohur mes tyre.
Hetimet për zbardhjen e plotë të rrethanave të ngjarjes vijojnë.
