Ish ushtari i UÇK-së, Blerim Ramadani, është arratisur nga “arresti shtëpiak” ku po qëndronte në Maqedoni të Veriut.
Ky veprim i Ramadanit, dyshohet se vjen meqë të njëjtit të enjten i është ndryshuar masa e sigurisë, që nënkuptonte rikthimin e tij në paraburgim.
Nga Ministria e Punëve të Jashtme të Republikës së Kosovës, kanë thënë se për ndryshimin e masës së sigurisë kanë marrë vesh nga avokati i Ramadanit.
“Ju njoftojmë që Ambasada e Republikës së Kosovës në Maqedoni të Veriut është njoftuar nga avokati i Ramadanit se është ndërruar masa e sigurisë nga arresti shtëpiak në kthim në paraburgim, në kohën kur i njëjti ishte në pritje të vendimit të Gjykatës Supreme”, thuhet nga MPJD.
E arratisja e Ramadanit, nga Serbia po cilësohet si skandaloze, për çka kërkojnë shpjegime nga autoritetet maqedonase.
“Fjala është për një pjesëtar të UÇK-së terroriste që ka kryer krime kundër serbëve në Kosovë e Metohi dhe të cilin Serbia e kërkon për ta gjykuar. Ne kërkojmë shpjegim nga autoritetet shtetërore të Maqedonisë së Veriut se si është e mundur që dikush që është arrestuar me fletarrest ndërkombëtar të vlefshëm të arratiset nga arresti shtëpiak”, ka thënë Daçiq, minister i Punëve të Brendshme.
Mediat maqedonase, raportojnë se Ministria e Punëve të Brendshme e Maqedonisë së Veriut, janë duke marrë masa për gjetjen e vendndodhjes së Ramadanit.
Për shkak të natyrës së urdhërarrestit të tij, avokati Xhevdet Smakiqi, e vlerëson arratisjen si veprim të duhur.
“Në Republikën e Maqedonisë nëse ai kapet, do të ketë pasoja ligjore sepse menjëherë do të shkojë në paraburgim. Duke qenë se ka qenë një arrest politik, një ndalim politik, Maqedonia si anëtare e NATO-s duke respektuar urdhërarreste të Serbisë të vitit 1999 të kohës së Millosheviqit, krejt politikisht e ka ndaluar Ramadanin, dhe unë si avokat vlerësoj se nuk e ka pritur një vlerësim objektiv dhe i drejtë, andaj e përgëzoj për arratisjen”, ka thënë ai.
Smakiqi potencon se nëse Ramadani hyn në Kosovë ai nuk do të ketë pasoja ligjore, por që autoritetet kosovare sipas tij nuk duhet të ndalen.
“Pasoja ligjore nuk do të ketë fare në Kosovë, ndërkohë që kërkoj nga Qeveria e Republikës së Kosovës që menjëherë ta ngritë këtë çështje edhe në Bashkimin Evropian dhe ta detyroj Qeverinë e Republikës së Maqedonisë së Veriut, që të merr vendim që të mos zbatojë udhërarrestet e Interpolit, të cilat Serbia i ka të kohës së Millosheviqit”, thotë ai.
Për këtë çështje ka reaguar edhe OVL e UÇK-së, duke theksuar se pushteti i ri në Maqedoni, që sipas tyre u ndihmua nga Kurti, po përndjek veteranët e luftës së UÇK-së.
Autoritetet serbe e akuzojnë Ramadanin se ka kryer krime lufte në rajonin e Nerodimes verën e vitit 1999.
