I veshur me tesha të ushtrisë së Serbisë, e i rrethuar me terroristë, po qëndronte para këtij objekti.
Video e nënkryetarit të Listës Serbe, Milan Radojcic ishte kryetemë nga e hëna.
Pas katër ditësh bastisje nga Policia e Kosovës, e ku u gjet armatim i rëndë dhe gjësende tjera që dëshmonin për grupin terrorist, më në fund edhe gazetarët u lejuan të hyjnë në Banjskë.
Këtu mësohet i tërë itinerari i terroristëve të udhëhequr nga Radojçiqi.
Pasi nuk i bëri ballë Policisë së Kosovës, grupi prej më shumë se 30 vetash, dëmtoi rrethojat e kësaj rruge malore.
E përmes saj u larguan drejt kufirit me Serbinë.
Ky nuk ishte i vetmi objekt që ata përdorën për t’u strehuar.
Disa prej tyre, gjendeshin edhe në oborrin e Manastirit të Banjskës.
E qëndrimi brenda këtyre mureve nuk ishte i gjatë.
Drejtori i policisë në këtë rajon, Veton Elshani thotë se hetime do të vazhdojnë.
Rrugët malore që ata i kanë përdorur vazhdojnë të jenë të pakalueshme, pasi sipas Policisë së Kosovës ka ende mjete shpërthyese që sulmuesit kanë lënë pas.
Sipas Elshanit, qëllimi i Policisë së Kosovës nuk ishte vrasja e askujt.
Përballë manastirit, dritat në këtë shtëpi janë ende të ndezura.
Dy katet e tyre kanë shërbyer që grupi terrorist të pushonte.
E ky plumb nga Policia e Kosovës, bëri që ata të braktisin edhe këtë objekt.
E autoblinda me zyrtarë policorë shihen gjatë gjithë kohës në këto anë.
Që ka pasur të shtëna, e dëshmojnë edhe këto gëzhoja.
E shenja të plumbave ka edhe poshtë rrugës kryesore për në Banjskë.
Këta kamionë u përdoren si barrikada fillimisht nga serbët të dielën kur edhe ndodhi sulmi terrorist.
Dhjetë metra larg këtij kamioni, dyshohet se mbeti i vrarë rreshteri Afrim Bunjaku.
Nga kryqëzimi i rrugës kryesore deri në Manastirin e Banjskës, janë te vendosur më shumë se shtatë postblloqe të Policisë së Kosovës që po mbajnë nën kontroll situatën e sigurisë.
