Të shtëna me armë zjarri kanë ndodhur në Mirushë të Malishevës të martën në mbrëmje, ndërmjet një personi të dyshuar për vjedhje dhe Policisë së Kosovës.
Policia njofton se pas marrjes së informatave për një rast të vjedhje të rëndë kanë dalë në vendin e ngjarjes, dhe gjatë kërkimit të dyshuarave kanë hasur në tre të dyshuar kur njëri nga ta ka gjuajtur me armë zjarri në drejtim të policëve.
Tutje bëhet e ditur se zyrtaret e PK-së i janë përgjigjur duke shtënë në drejtim të tyre.
“Njësitë policore janë përgjigjur thirrjes për një rast vjedhje e rëndë. Njësiti policor ka dalë në vendin e ngjarjes dhe gjatë kërkimit të personave të dyshuar kanë takuar tre persona ku pasi u është dhënë urdhri për ndalim njëri nga të dyshuarit në afërsi prej rreth 15 metra ka shtënë me armë zjarri në drejtim të zyrtarëve policorë, po ashtu edhe zyrtarët policorë i janë kundër përgjigjur duke shtënë në drejtim të tyre”, thuhet në raportin 24-orësh të PK-së, raporton teve1.info
Sipas njoftimit të dyshuarit janë larguar nga vendi i ngjarjes, ndërsa nuk raportohet për të lënduar.
