Sekretari i Partisë Demokratike të Kosovës, Betim Gjoshi ka deklaruar se pretendimet e kryeministrit Albin Kurti për prosperitet ekonomik në Kosovë janë fjalë të kota.
Gjoshi përmes një reagimi në Facebook tha se statistikat po e nxjerrin në shesh propagandën e kryeministrit dhe po e dëshmojnë gjendjen e vërtetë e të rëndë ekonomike në vend.
“Të dhënat që vijnë nga Agjencia e Statistikave të Kosovës, që flasin për vitin 2022, por që janë publikuar në vitin 2023, janë shqetësuese. Sipas ASK-së: “43.4% e ekonomive familjare në Kosovë nuk mund të përballojnë një shpenzim të papritur prej 100 €”. Pra, ja çka i ka bërë Kosovës, i paafti Albin Kurti”, tha ai.
Derisa ka thënë se Qeveria Kurti nuk ka marrë asnjë hap për të rritur pagat apo për të marrë masa që të mos ketë shtrenjtime të cilat ia rëndojnë jetën qytetarit.
“Duke e shtrenjtuar çdo ditë jetën e qytetarëve të Kosovës, qytetarët nuk po arrijnë të mbajnë para, sepse ato duhet shpenzuar në fatura të domosdoshme dhe të detyrueshme. Edhe pse këto shpenzime/fatura janë rritur, në raste të caktuara 115% siç është rasti me energjinë elektrike, Kurti dhe Qeveria e tij nuk ka ndërmarrë asnjë hap të vetëm për të rritur pagat apo për të marrë masa që këto shtrenjtime të mos ndodhnin”, shtoi Gjoshi./teve1.info./
