Gjykata Themelore në Prishtinë ka dënuar Nenad Milkoviqin dhe Aleksandar Llaziqin me nga gjashtë muaj burgim për veprën penale të huliganizmit dhe pjesëmarrjes në turmë, në lidhje me ngjarjet e vitit 2021 në veri të vendit.
Megjithatë, masa e burgimit u është zëvendësuar me dënim me gjobë prej nga 4,000 euro secilit.
Të dy të akuzuarit një ditë më parë kanë pranuar fajësinë, ndërsa katër të tjerët – Sreqko Sofronijeviq, Ilija Viqentijeviq, Millan Viqentijeviq dhe Marko Rakiq – nuk e kanë pranuar dhe procesi ndaj tyre do të vazhdojë.
Sipas aktakuzës së Prokurorisë, ngjarja kishte ndodhur në tetor të vitit 2021, kur të pandehurit kishin sulmuar zyrtarët policorë të Kosovës me gurë, shufra druri e metali dhe me granata dore.
Prokuroria thekson se grupi u kishte zënë pritë njësive policore, duke vendosur barrikada, ndërsa mjetet e blinduara të Policisë ishin goditur me plumba dhe granata dore, nga ku tre policë kishin mbetur të plagosur.
Avokatët Haxhi Millaku dhe Jelena Krikokapiq, që përfaqësojnë Milkoviqin dhe Llaziqin, thanë se pranimi i fajësisë është bërë me vullnet të lirë nga të mbrojturit e tyre.
Nëse të dënuarit nuk i paguajnë gjobat, dënimi me gjobë do të zëvendësohet me burgim efektiv.
