Përfundimisht gjobat e shqiptuara në trafik në qytetin e Shkupit, Tetovës e Kumanovës nuk do të dërgohen në gjuhën shqipe.
Kështu ka vendosur Gjykata Kushtetuese e Maqedonisë së Veriut e cila ka refuzuar tri iniciativa ku u kontestuan dispozitat e ligjit për kundërvajtje dhe aplikimit të sistemit “Smart City”, i cili ka hyrë në funksion që prej muajit shkurt.
Kryetari i Kushtetueses, Darko Kostadinovski, tha se nuk pajtohet se “bëhet fjalë për shkurtimin e të drejtave për përdorimin e gjuhëve”.
Ai shtoi se SMS-at për gjoba që dërgohen në gjuhën maqedonase, mund të dërgohej edhe në gjuhën angleze, por jo edhe në shqip.
Kjo ngjalli reagimin e Bashkimit Demokratik për Integrim, të cilët kërkuan shkarkimin e menjëhershëm të Kostadinovskit.
“Duke na i tërhequr vëmendjen se njohja e gjuhës maqedonase nuk është vetëm e drejtë, por edhe detyrë, është edhe detyrë e ripotencon, madje lëshohet në kualifikime që fare nuk kanë të bëjnë me profesionin dhe detyrën e tij… Nuk i përkasin një kryetari i cili nuk ka hezituar në asnjë moment të cenojë e të rrënojë marrëdhëniet ndëretnike në vend”, thotë Arbër Ademi , sekretar i BDI-së
Sekretari i kësaj partie për këtë një pjesë të fajit ia lë edhe koalicionit VLEN që përbëhet nga parti shqiptare të cilat janë pjesë e Qeverisë.
“Faji është te formimi i një Qeverie pa legjitimitet etnik duke pasur shqiptarë që kanë humbur zgjedhjet të cilët nuk e kanë besimin e shqiptarëve, janë pjesë e kësaj Qeverie sigurisht se kjo i inkurajon forcat destruktive të cilat janë nacionaliste këtu tek ne dhe ata marrin guximin që sot të kontestojnë ligjin për gjuhën shqipe 75 faqe referat kanë bërë”, shprehet ai.
E sipas analistit Ardian Ramadani, frymë e njëjtë e veprimit kundër shqiptarëve është edhe në institucione tjera që udhëhiqen nga maqedonasit.
“Dhe e dyta segregimi apo diskriminimi i dytë vie edhe nga vetë ata përfaqësues që janë shqiptarë të cilët me njëfar forme nga frika se do ta hidhërojnë vartësin e tyre maqedonas, përpiqen që të tregohen kosmopolitë, të tregohen se ja ne jemi për bashkëjetesë, ne jemi kosmopolitë, ne e flasim gjuhën sllave, maqedonase”, vlerëson Ramadani.
Ndaj deklaratës së Kostadinovskit ka reaguar edhe ministri i Ekonomisë, Besar Durmishi i cili tha se ai duhet ta mbrojë Kushtetutën dhe jo të merret me politikë ditore.
