Një grua është vrarë në Pejë pasditen e së premtes në Pejë. Rastin fillimisht për teve1.info e bën të ditur nga Policia e Kosovës. Gruan dyshohet se e privoi nga jeta i biri i saj, i cili edhe është arrestuar. I njëjti nuk ka qenë në gjendje të flasë për rastin të premten, teksa gjatë së shtunës pritet të merret në pyetje në prani të psikologut. Këtë e bëri të ditur për teve1.info zëdhënësi i prokurorisë në Pejë, Shkodran Nikçi. Për ngjarjen janë siguruar edhe dëshmitarë okularë. Mediat kanë raportuar edhe për motivet e dyshuara por që mbesin të pakonfirmuara.
Por çka dihet deri më tani për rastin
Policia në Pejë bëri të ditur se rreth orës 16:00, kishte marrë informacion për një vrasje në rrugën “Mbreti Zog” në Pejë.
“Sot rreth orës 16:00 Policia është informuar në lidhje me këtë rast. Policia ka dalë në vendin e ngjarjes, saktësisht në rrugën “Mbreti Zog” në Pejë. Aty ka dalë edhe mjeku kujdestar i cili e ka konstatuar vdekjen e viktimës. Rasti po hetohet për “vrasje të rëndë”, ka thënë Rugova për tëvë1.
Policia tutje njoftoi se i dyshuari ishte arrestuar menjëherë.
Sipas raportimeve të shumta fillestare në media, dorasi dyshohej që ishte i biri i viktimës.
Kjo u konfirmua më pas edhe nga prokurorja e rastit, Sahide Gashi.
Prokuroria në Pejë ka siguruar edhe dëshmitarë okularë të ngjarjes tragjike në Pejë.
Kështu ka bërë të ditur për teve.info, zëdhënës i Prokurorisë Themelore në Pejë, Shkodran Nikçi, i cili tha se bashkë me forenzikën, kanë dalë në vendngjarje dhe janë mbledhur të gjitha provat.
Ai po ashtu tha se i dyshuari nuk ishte në gjendje të mirë emocionale dhe se do të merrej në pyetje të shtunën në prani të psikologëve.
“Kemi provuar që të dyshuarin ta marrim në pyetje, por s’ka qenë në gjendje dhe kemi urdhëruar që nesër në prezencë të psikologut dhe avokatit mbrojtës të provohet merret deklarata e të njëjtit”, tha Nikçi.
Nikçi po ashtu tha se është urdhëruar edhe autopsia e trupit të tashmë të ndjerës dhe është sekuestruar mjeti i dyshuar për vrasjen në fjalë.
Sipas Prokurorisë, në bazë të rrethanave, do të udhërohet edhe ekzaminimi i të dyshuarit në Institutin e Psikiatrisë Forenzike.
Mediat kanë raportuar edhe për disa dyshime mbi motivet e vrasjes, por që mbeten ende të pakonfirmuara.
