Nënkryetari i Aleancës për Ardhmërinë e Kosovës, Ardian Gjini, ka thënë se opozita në Kosovë nuk do të zhduket kurrë, raporton teve1.info
Ai këto deklarime i bëri në emisionin “Info-Nata” në Tëvë1, ku tha se para se të zhduket opozita në një vend demokratik duhet të zhduket demokracia.
Gjini këto komente i bëri pas deklaratës së kryeministrit Albin Kurti të hënën kur tha se zgjedhjet nuk i konvenojnë pozitës pasi sipas tij, zhduket opozita.
Fjalorin e kryeministrit Kurti, Gjini e quajti tendencë totalitare të kontrollit të plotë.
“Krejt kot janë këto fraza. Më duhet prapë me shpjegu që mua më bënë përshtypje prej një aspekti tjetër. Nuk zhduket opozita në demokraci kurrë. Nuk ka ndodhë. Nëse është zhdukë opozita është zhdukë demokracia fillimisht dhe në Kosovë kurrë nuk ka me ndodhë me u zhdukë opozita dhe opozita gjithmonë ka me i fitu zgjedhjet se i ka fitu gjithmonë. Opozita i fiton zgjedhjet, një ditë të caktuar i fiton. Por, fjalori i tillë e konfirmon që Kurti ka tendenca të pastra totalitare të kontrollit të plotë. E di që është zhgënjy shumë në zgjedhje lokale vetëm 6 muaj pas zgjedhjeve nacionale kur i ka humbur shumicën komunave”, ka deklaruar Gjini.
