Anëtari i Kryesisë së AAK-së, Labinot Gjini duke komentuar dështimin e Kosovës për tu anëtarësuar në Këshillin e Evropës e ka bërë përgjegjës siç e quan ai binomin Osmani – Kurti.
Madje sipas Gjinit, kjo qeveri është më e dështuara në historinë e pasluftës së Kosovës.
“Këto dështime nuk kemi kujt t’ia veshim tjetër përveç se qeverisë së Albin Kurti, dhe Vjosa Osmanit. Ky binom ka treguar se kjo është qeveria më dështake në historinë e Kosovës prej kur kemi dalë nga lufta”, është shprehur ai në emisionin “Ditari” në TËVË 1.
Më tej, anëtari i kryesisë së AAK-së, ka thënë qeveria aktuale po luan lojëra, ku populizmin e brendshëm po tenton ta bartë edhe jashtë, por që sipas tij kjo nuk funksionin në arenën ndërkombëtare.
Gjini ndërkohë, sheh që tani ka një lojë garash në nivelin institucional se kush po promovohet më shumë.
“Sërish e kuptojmë që kjo qeveri po luan lojëra të cilat i ka bartur nga populzimi i brendshëm, në populizëm të jashtëm. Këto lojëra të Kurtit kanë treguar deri më tani vetëm dështim. Sot Kosova e ka humbur besimin në arenën ndërkombëtare. Kurti ka menduar që përmes mashtrimeve të vogla arrin me i hedh hi syve bashkësisë ndërkombëtare. Këto lojëra pa vizion nuk funksionojnë. Kjo është një fatkeqësi shumë e madhe, është lojë garash në nivelin institucional se kush po promovohet më shumë Osmani apo Kurti”, ka shtuar ai. /teve1.info/
