Mbrojtësi i Kombëtares së Shqipërisë, Berat Gjimshiti ka folur për triumfin e skuadrës së Atalantas në Ligën e Evropës.
Atalanta, të mërkurën mbrëma e fitoi trofeun e Ligës së Evropës pasi në finalen e luajtur në Dublin të Irlandës e mposhti Bayer Leverkusenin me rezultatin 3:0.
Për Atalantan, ky është trofeu i parë në garat evropiane, ndërsa i dyti në histori të klubit pas triumfit në Kupën e Italisë që e fitoi në vitin 1963.
Më i merituari për këtë sukses tek Atalanta ishte sulmuesi Ademola Lookman, i cili realizoi “hat-trick” për t’ia shkaktuar Leverkusenit humbjen e parë këtë edicion.
“Është vështirë ti gjej fjalët për ta përshkruar këtë moment, pasi ende nuk po mundem të besoj se çfarë kemi arritur. Ky është një sukses i madh për ne, sidomos pas humbjes në finalen e Kupës së Italisë një javë më parë. Kemi luajtur mirë dhe e kemi merituar këtë trofe për të cilin jam krenar që e ngrita si kapiten i Atalantas”, ka thënë Gjimshiti.
Gjimshiti ishte i pazëvendësueshëm tek Atalanta në këtë finale, sikurse Granit Xhaka që u aktivizua gjatë tërë ndeshjes te skuadra e Leverkusenit.
