Me moton “Aty ku dija nuk ka kufij”, në objektin e gjimnazit “Xhevdet Doda” në Prishtinë u mbajt të premten Panairi i Shkencës dhe Kulturës.
Nxënës e profesorë u mblodhën në këtë shkollë për të prezantuar eksperimentet e projektet e tyre në fushën e shkencës e kulturës.
E këtë vit, pjesë e këtij panairi ishte edhe Gjimnazi i specializuar matematikor.
“Sot e kemi ekspozu punën tonë një vjeçare si gjimnaz matematikor sa i përket shkencave. Unë po merrna me lëndë të kimisë me eksperimente të lëndës së kimisë. Vlen të ceket që në gara ndërkombëtare ne si gjimnaz kemi korr suksese në pjesën e shkencave ku në PISA 2022 e kemi nxënë vendin e parë në gjithë Kosovën”, tha nxënësi Eni Ymeri.
Nga afër, eksperimentet e nxënësve i pa edhe drejtori i Arsimit në Komunën e Prishtinës, Samir Shahini.
“Është një dëshmi e gjallë e përkushtimit të nxënësve, punës së tyre të jashtëzakonshme, është një dëshmi e gjallë e talentit tonë që e kemi si Prishtinë si kryeqytet por edhe si Kosovë edhe një dëshmi me ndryshe që po na servohet fatkeqësisht”, deklarohet Shahini.
Për këtë panair, nxënësit e profesorët punuan edhe jashtë orarit mësimor.
“Gjatë procesit mësimor është punuar mësim shtesë, mësimdhënësit janë angazhuar në mësim shtesë dhe kanë përgatitur eksperiment të cilat edhe i praktikojnë gjatë procesit mësimor por sot është një përmbledhje”, tregoi drejtoresha e Gjimnazit të Specializuar Metematikor, Fahrije Latifi-Retkoceri.
Edhe sipas drejtori të gjimnazit “Xhevdet Doda”, ky panair është një dëshmi e përkushtimit të nxënësve.
“Ky panair është një dëshmi e përkushtimit dhe talentit të nxënësve tanë të cilët përmes punës së tyre njohura nuk njeh kufi, panairi përfshin një gamë të gjerë të fushave si fizika kimia biologjia, gjuha”, tha Isak Bregaj.
Gjatë panairit pati edhe pika artistike të përgatitura nga nxënësit e të dy shkollave.
