Skuadra e Gjilani ka njoftuar mbi gjendjen shëndetësore të futbollistëve Robert Rrahmani, Edison Kqiku dhe Eldonit Shaqiri, të cilët kanë përfunduar edhe ekzaminimet e fundit mjekësore.
Rrahmani në ndeshjen e fundjavës ndaj Suharekës ka marrë një goditje dhe për pasojë thuhet se “ka pësuar traum dhe çarje në mukozë dhe pjesën e jashtme të buzës së poshtme, me ç’rast është dashur intervenimi kirurgjikal duke i vendosur sutura”.
Gjendja e Rrahmanit është stabile dhe futbollisti pritet të jetë i gatshëm në seancën e radhës stërvitore pas ditëve të dhënë të lira nga stafi teknik.
Kapiteni Edison Kqiku “kishte ndjerë një shqetësim në muskulin e këmbës së majtë gjatë seancave stërvitore dhe pas ekzaminimeve të fundit mjekësore është konstatuar se ka pësuar ruptur partiale të muskulit gastroknemius” njofton klubi.
Kështu që, Kqiku do jetë jashtë aktivitetit fizik me skuadrën gjatë dy javëve në vijim, ndërkohë që mund të filloj të stërvitet në palestër.
Ndërkohë, sa i përket Shaqirit thuhet se edhe ai është i hospitalizuar pasi Eldonit “gjatë stërvitjeve në javën e shkuar ai ka pësuar një distorsion të nyjës T/C të djathtë dhe është detyruar të izolojë këmbën me gips”.
Periudha e rikthimit të tij në aktivitet do të vlerësohet pas kontrolleve të radhës, ka shkruar skuadra e Superligës së Kosovës.
