Qytetit të Gjilanit pritet t’i shtohen edhe dy projekte të reja në fushën e kulturës dhe sportit.
Për këtë, kryetari i Komunës, Alban Hyseni elaboroi në detaje projektet të Kult Qendrës dhe renovimin e palestrës së sporteve “Bashkim Selishta”.
Rreth projektit të parë, Hyseni u shpreh se përfshin ndërtimin e qendrës së re kulturore ku do të ketë një sallë alternative për teatër me 200 ulëse, por edhe qasje për personat me aftësi të kufizuara.
“Vlera e projektit të Kult Qendrës është 1.2 milionë euro, ku përpos sallës së teatrit, atje do të fillojmë edhe me institucionalizimin kinemasë së qytetit, pastaj galeria e re e qytetit, pasi hapësira aktuale është vështirë e qasshme dhe hapësirë e vogël për këto aktivitete. Galeria e re e qytetit do të ketë rreth 400 m2. Në këtë objekt do të ketë edhe zyra e ambiente të punës, zhveshtore të artistëve të teatrit dhe një bufe e vogël”, ka deklaruar ai.
Po ashtu, i pari këtij qyteti foli edhe për projektin e renovimit të palestrës sportive, ku theksoi se vlera totale është 2.3 milionë euro, ku pjesë e saj tha se është edhe salla e xhudos.
“Projekti përfshinë rregullimin e hapësirës së jashtme, hapësirën përreth tij, të terrenit sportiv, tribunat e hapësirat për parking. Ndërkohë, në pjesën e brendshme, ku investimet paraprake kanë qenë kozmetike, përfshinë edhe rregullimin e qatisë e dyshemesë. Do të bëhet ndërrimi i plotë i kulmit ku do të përfshihen edhe panele solare për ngrohjen e ujit për nyjet sanitare, do të rregullohet edhe sistemi modern i ngrohjes”, ka thënë Hyseni.
Sipas kryetarit Hyseni, projektet që do të implementohen këto dy vite janë me rëndësi kapitale për qytetin për ta sjellë një transformimi infrastrukturor dhe përmbajtësor për zhvillimin e këtyre aktiviteteve.
