Trajneri i Gjilanit, Ardian Nuhiu ka gjithë grupin e futbollistëve në dispozicion pasi në stërvitje i janë rikthyer edhe Marko Roganoviq, Sabit Bilali e Lazim Krasniqi.
Klubi i Superligës së Kosovës, të hënën ka njoftuar se tre futbollistët janë rikuperuar plotësisht nga lëndimet dhe i janë bashkuar pjesës tjetër të ekipit në seancën stërvitore.
“Pas një periudhe rikuperimi dhe trajtimi të kujdesshëm nga stafi mjekësor, të tre lojtarët kanë kaluar disa ditë jashtë fushës. Me kënaqësi njoftojmë se ata tashmë kanë filluar të ushtrojnë me ekipin dhe janë në rrugë të mirë drejt rikthimit të plotë”, thuhet në njoftimin e Gjilanit.
Roganoviq kishte dëmtuar gjurin ditë më parë, ndërsa Bilali e Krasniqi kishin pësuar lëndime në nyjën e këmbës së majtë, përkatësisht të djathtë.
Gjilani javën e kaluar ka zbarkuar në Antalia për të vazhduar fazën përgatitore, ndërsa deri më tani e ka luajtur edhe një ndeshje miqësore, në të cilën e ka mposhtur Kaysarin e Kazakistanit me rezultatin 2:1.
